१५ असोज, काठमाडौं ।
क्रान्तिकारी पत्रकार संगठन नेपालले आज पोखरामा मानवधिकार तथा प्रेस स्वतन्त्रता सम्बन्धी विषयमाथि बृहत् अन्तरक्रिया कार्यक्रम गर्दैछ ।
संगठनको केन्द्रीय योजनाअनुसार तय गरिएको यस कार्यक्रम सोमबार पोखरास्थित नेपाल पत्रकार महासंघ कास्कीको सभाहलमा बिहान ११ बजे ‘मानवअधिकार र प्रेस तथा अभिव्यक्ति स्वतन्त्रता’ विषयक बृहत अन्तरक्रिया हुन गइरहेको संगठनका केन्द्रीय सदस्य ओम हमालले जानकारी दिएका छन् ।
कार्यक्रममा अधिकारकर्मी, वकिल, व्यवसायी, संचारकर्मी, महिला तथा विभिन्न राजनीतिक दलका तर्फबाट प्रतिनिधिहरु सहभागी हुने संगठनले जनाएको छ ।
यसअघि संगठनले दाङको घोराही, कञ्चनपुरको महेन्द्रनगर, कैलालीको धनगढी, बाँकेको नेपालगन्ज, सुर्खेतको वीरेन्द्रनगर र रुपन्देहीको बुटवलमा अन्तरक्रिया कार्यक्रम सम्पन्न गरिसकेको छ ।
मुलुकमा बढ्दै गइरहेको मानवअधिकारको हनन् तथा प्रेस स्वतन्त्रतामाथिको हस्तक्षेपको सन्दर्भमा आयोजित यस कार्यक्रमले अधिकारको रक्षा र अभिव्यक्ति तथा विचारको स्वतन्त्रताको पक्षमा जागरण ल्याउने विश्वास आयोजक पक्षले लिएको छ ।
