काठमाडौं,असोज १३ ।
झण्डै पाँच वर्षको अन्तरालमा शहीद स्मारक ए डिभिजन लिग फुटबल प्रतियोगिता आजबाट राजधानीमा सुरु हुँदै छ । पछिल्लो पटक २०७० सालयता ए डिभिजन लिग सञ्चालन भएको छैन ।
२०७१–७२ सालमा राष्ट्रिय लिग आयोजना भएको थियो भने भूकम्पका कारण त्यसयता लिग हुन सकेको छैन । आज हुने लिगको उदघाटन खेलमा त्रिभुवन आर्मी र न्यूरोड टिम (एनआरटी)बीच प्रतिस्पर्धा हुनेछ ।
यी दुइ टोलीबीचको खेल सातदोबाटोस्थित एन्फा कम्प्लेक्सको मैदानमा अपरान्ह ३ बजेदेखि सुरु हुनेछ । त्यसअघि उद्घाटन कार्यक्रम भने दिउँसो साढे २ बजेदेखि सुरु हुने आयोजकले जनाएको छ ।
प्रतियोगिताअघि भएको पत्रकार सम्मेलनमा सहभागी सबै टिमका प्रशिक्षकहरुले लिगमा आफ्नो लक्ष्यका साथै दावेदारिता पनि प्रस्तुत गरेका थिए । आर्मीका प्रशिक्षक नवीन न्यौपानेले आर्मी पहिलो पटक लिग जित्न उत्सुक रहेको प्रतिक्रिया दिए ।
