काठमाडौं, असोज ११ ।
दुबइमा जारी एसिया कप क्रिकेटको उपाधि भिडन्त भोली हुुँदै छ । उपाधिका लागि भोली भारतले बंगलादेशको सामना गर्नेछ ।
गएराति भएको खेलमा पाकिस्तानलाई हराँउदै बंगलादेश एसिया कप क्रिकेट प्रतियोगिताको फाइनलमा प्रवेश गरेको हो । सुपर फोर चरणको अन्तिम खेलमा बंगलादेशले पाकिस्तानलाई ३७ रनले पराजित गरेको हो ।
खेलमा पहिले व्याटिङ गरेको बंगलादेशले ४८ ओभर ५ बलमा अलआउट हुनुपूर्व २ सय ३९ रन जोड्यो । बंगलादशेका लागि विकेटकिपर ब्याट्सम्याज मुस्फिकर रहिमले ९९ रन जोड्दा मोहोमद मिथुनले ६० रनको योगदान दिए ।
बलिङतर्फ पाकिस्तानका जुनेद खानले ४ विकेट लिए । जवाफमा २ सय ४० रनको चुनौती पछ्याएको पाकिस्तानले ५० ओभरमा ९ विकेट गुमाउँदै २ सय २ रन मात्रै बनाउन सक्यो ।
पाकिस्तानका ईमाम उल हकले ८३ रन जोड्नुबाहेक अन्य कुनैपनि खेलाडीले सम्झनलायक पारी खेल्न सकेनन् । पाकिस्तानलाई सस्तैमा समेट्न बंगलादेशका मुस्तफिजुर रहमानले ४ विकेट लिए । भारत यसअघि नै प्रतियोगिताको फाइनलमा पुगिसकेको छ ।
