पोखरा, असोज १० ।
पोखरा–२२ पुम्दीभुम्दीको कोदी गाउँकी श्रीया सुनार सोमबार साँझ साढे ५ बजे मामाघरबाट निस्किएकी थिइन् । बिस्कुट किन्न पसल हिँडेकी १० वर्षीया सुनार मंगलबार बिहान मृत अवस्थामा भेटिइन् ।
बलात्कारपछि हत्या गरिएकी पोखरा–२२ पुम्दीभुम्दीकी श्रीया सुनारकी आमा बेलकुमारीलाई सम्हाल्दै उनका आफन्त । तस्बिर : दीपक परियार
सुनारका बाबुले दुई वर्षअघि अर्की बिहे गरेपछि भैरहवातिर लागेका थिए । आमा बेलकुमारीलाई रोगले च्याप्यो । बेलकुमारीका पिता लीलबहादुर सुनारले छोरी, तीन नातिनी र एक नातिलाई आºनैमा बोलाए । जम्मा २० मिनेटको दूरी छ दुई घरको । ज्यामी काम गरेर सकीनसकी उनले छोरीको उपचार गराए । नातिनातिना पढाए । केही बिसेक भएपछि गत बुधबार मात्रै बेलकुमारी घर फर्केकी थिइन् । श्रीया घरि घर, घरि मामाघर गरिरहन्थिन् ।
उनी मामाघरमै बस्ने भइन् । गाउँकै लीला आधारभूत विद्यालयमा उनी ३ कक्षामा पढ्थिन् । आइतबार स्कुलबाट आएर खाजा खान पाँच रुपैयाँ लिएर पसल हिँडिन् । मामाघर र पसलको दूरी पाँच मिनेट पनि छैन । बिस्कुट किन्न हिँडेकी नातिनी अबेरसम्म घर नफर्केपछि हजुरआमा विष्णुमाया र मामा कृष्णले यताउता खोजे । आफन्तलाई फोन गरे । हजुरबुवा लीलबहादुर कामबाट फर्किएर बेलुका ९ बजेसम्म खोजे । श्रीया कतै फेला परिनन् ।कान्तिपुर दैनिकबाट
