२९ भदौ, काठमाडौं ।
नेपाल कम्युनिस्ट पार्टीका नेतृ एवं पोलिटब्यूरो सदस्य उमा भुजेल ‘शिलु’को हकमा पदमबहादुर भुजेलले दर्ता गरेका बन्दी प्रत्यक्षीकरण रिटमाथिको बहस सकिएको छ ।
बहस न्यायाधीश चोलेन्द्र शमसेर जबरा र डम्बरबहादुर श्रेष्ठको संयुक्त इजलास नम्बर २ मा भएको थियो । जिल्लाको एक क्रसर उद्योगमा आगो लगाएर ‘संगठित अपराध’ गरेको अभियोगमा काभ्रे प्रहरीको आग्रहमा काठमाडौंको वनस्थली खरिबोटबाट काठमाडौं प्रहरीले यही भदौ १२ गते गिरफ्तार गरिएका नेतृ भुजेललाई सर्वोच्चले उनीमाथिको अभियोग प्रमाणित हसन नसकेको ठहर गर्दै यसै हप्ता रिहा गर्न आदेश दिएको थियो ।
तर रिहालगत्तै नुवाकोट प्रहरीको आग्रहमा सर्वोच्च परिसरबाटै काठमाडौं प्रहरीले गिरफ्तार गरी नुवाकोट सदरमुकाम पुर्याएर आगजनीको अर्को अभियोग लगाएर हिरासतमा राख्दै आएको छ । आजको बहस सकेपछि सुनसवाई हुन बाँकी छ ।
हाल भुजेलसहित नेकपाका पाँच जना पोलिटब्यूरो सदस्य विभिन्न अभियोगमा विभिन्न जिल्ला प्रहरी कार्यालयको हिरासतमा राखिएको छ ।
