काठमाडौं,२७ भदौ ।
साफ च्याम्पियनसिप अन्तर्गत् पहिलो सेमिफाइलनमा आज नेपालले माल्दिभ्सविरुद्ध खेल्दैछ ।
अपरान्ह पौने ४ बजे ढाकास्थित बंगबन्धु रंगशालामा यी दुई टोलीबीचको प्रतिस्पर्धा हुनेछ ।
२५ वर्षे साफ च्याम्पियनसिपको इतिहासमा आज हुने सेमिफाइनल नेपालका लागि इतिहास रच्ने अवसर हो ।
अहिलेसम्म सेमिफाइनलभन्दामाथि नपुगेको नेपाल माल्दिभ्सलाई पराजित गर्नसके साफ च्याम्पियनसिपमा नयाँ इतिहास कायम गर्न सफल हुनेछ ।
पाँचौंपटक सेमिफाइनल खेल्न लागेको नेपाली टोलीका लागि माल्दिभ्स केही कमजोर प्रतिद्वन्द्वी देखिएको छ ।
यसअघि, सन् १९९५, सन् १९९९, सन् २०११ र २०१३ मा नेपाल सेमिफाइनल सम्म पुगेको थियो । समूह चरणमा दुई खेल खेलेको माल्दिभ्स एकमा पराजित र एकमा बराबरी गर्दै सेमिफाइनल पुगेको हो । नेपाल भने एक खेलमा पराजित र दुई खेलमा विजयी हुँदै सेमिफाइल पुगेको हो ।
पहिलो सेमिफाइनलमा प्रतिस्पर्धाका लागि मैदान उत्रँदै गर्दा दुवै टोलीको लक्ष्य फाइनल पुग्नु रहनेछ । नेपालले साफ च्याम्पियनसिपमा माल्दिभ्सलाई अहिलेसम्म पराजित भने गर्न सकेको छैन ।
यस्तै आजै साँझ हुने दोस्रो सेमिफाइनलमा भारत र पाकिस्तान प्रतिस्पर्धा गर्नेछन् । सेमिफाइनलमा पुगेका चारमध्ये भारतले सर्वा्धिक सातपटक तथा माल्दिभ्सले एकपटक साफ च्याम्पियनसिपको उपाधि जितिसकेका छन् ।
