काठमाडौं, भाद्र २६ ।
नारायणगढ मुग्लिन सडकको चार किलोमा ठुलो पहिरो गएका कारण नाायणगढ मुग्लिन सडक खण्ड रातिदेखि नै अवरुद्ध छ ।
नारायणगढ मुग्लिन सडक आयोजनाका सुचना अधिकारी इन्जिनियर शिव खनालले दिएको जानकारी अनुसार आज दिनभर सडक खुल्ने सम्भावना न्यून रहेको छ । उक्त क्षेत्रमा रातिदेखि नै ठुलो पानी परी रहेको छ ।
चार किलोमा ठुलो पहिरो खस्नुका साथै जलबिरे क्षेत्रमा साना पहिरोहरु खसेका कारण त्यस क्षेत्रमा राति १ बजेयता सवारी सञ्चालनमा आउन सकेका छैनन् । अन्य क्षेत्रमा खसको पहिरो सामान्य भए पनि चारकिलोको पहिरो सफा गरेरे सवारी सुचारु गर्न आज अपरान्ह तीन ब्जे सम्म लाग्ने अनुमान छ ।
खनालका अनुसार ठुलो पानी परेका कारण पहिरो हटाउने काम सुरु गर्न सकिएको छैन । पानी रोकिना साथ फिस्लिङबाट मगाएको उपकरण र यता हामीसँग भएको उपकरणले सफा गरेर दिउँसो तीन बजेसम्म बाटो खुलाउने तयारी भएको उहाँले बताउनु भयो ।
पहिरोले निकै दुख दिने यो सडकमा साउन २१ गतेयता आज मात्रै ठुलो पहिरो गएको हो । दैनिक १० हजार गाडी आवातजावत गर्ने सो बाटोमा आज तीजको दर खान माइत हिँडेका महिलाहरुलाई पनि समस्या परेको छ ।
