२३ भदौ, काठमाडौं ।
नेपाल कम्युनिस्ट पार्टीका प्रवक्ता खडगबहादुर विश्वकर्मा ‘प्रकाण्ड’को घर कालिकोटको माल्कोटस्थित घरमा प्रहरीले छापा मारेको छ ।
आफूलाई जिल्ला प्रहरी कार्यालय मान्माले पठाएको बताउने डीएसपीको नेतृत्वमा आएको हतियारसहितको टोलीले शुक्रबार बेलुका छापा मारी तलासी लिएको हो ।
टोलीले तलासी लिने क्रममा धम्की समेत दिइएको र घरमा रहेका प्रकाण्डका बुबा वर्ष ७३ का पहले विश्वकर्मा र बहिनी जयपुरा विश्वकर्मालाई छोरा र नातिहरुबारे सोध्ने र डर देखाउने हर्कत गरेको जानकारी दिएका छन् ।
शुरुमा ‘के कसो छ सोध्न आएको’ भनिएपनि फर्किने बेला टोलीले नयाँ मान्छे आउँदा प्रहरीलाई खबर गर्न र नेकपाका मान्छेलाई खान, बास नदिन र दिएमा ठीक नहुने धम्की दिइएको थियो ।
प्रवक्ता प्रकाण्डलाइ गत साउन २२ गते काठमाडौंबाट गिरफ्तार गरी राज्यले कब्जामा राख्दै आएको छ । पाँचौंपटकको गिरफ्तारपछि अर्को अभियोगमाअहिले दाङको जिल्रला प्रहरी कार्यालय घोराही हिरासतमा राखिएको छ ।
