सल्यान, भदौ १८ । सल्यानको बागचौर नगरपालिका १२ ओख्रेनी मुलखोलामा आएको पहिरोमा परी तीन बालबालिकाको मृत्यु भएको छ ।
स्थानीय बालाराम डाँगीको घर पहिरोमा पुरिँदा उनका २ छोरी १ छोराको मृत्यु भएको हो ।
पहिरोमा पुरिएका उनकी १० बर्षिया छोरी ललिता डाँगी,७ बर्षीया छोरा ललित वली र बर्ष चारकी छोरी मेनका डाँगी शव आज बिहान पहिरोवाट निकालिएको सल्यानका प्रहरी प्रमुख नायव उपरीक्षक विरेन्द्र वहादुर शाहले जानकारी दिनुभयो ।
पहिरोमा परेर बालाराम डाँगी र उनकी श्रीमती समेत घाईते भएको बताइएको छ । बालबालिकाले खाना खाँदै गरेको समयमा आएको पहिरोले ३ बालबालिकाहरु र बस्तुभाउलाई पुरेको १२ वडाका वडा अध्यक्ष दिपक वलीले जानकारी दिनुभयो ।
राति नै उद्दारका लागि इलाका प्रहरी कार्यालय सिमखोली र इलाका प्रहरी कार्यालय थारमारेबाट प्रहरी परिचालन गरिएको भएपनि रातभर पानी परेकोले आज बिहान बाट मात्र उद्धार सुरु गरिएको थियो ।
यसैबीच भुपेन्द्र डाँगीको घर पहिरोको जोखिममा रहेको छ । बालाराम डाँगीको घर संगै रहेको डाँगीको घर जोखिम परेको हो ।
वागचौर नगरपालिका प्रमुख लोकमान वुढाथोकी, प्रमुख जिल्ला अधिकारी कमलराज ढकाल लगायतका टोली बिहानै घटना स्थल हिडेको छ ।
उद्धारका लागि स्थानीय वासिन्दा, जनप्रतीनिधी प्रहरी परिचालित भएका छन् । राप्ती राजमार्ग भन्दाको सल्यान रुकुम सडक खण्डको शिवरथबाट वाफुखोला जान ४ घण्टा पैदल हिड्नु पर्ने भएको समेत प्रहरीको भनाई छ ।
