राजविराज, १८ भदौ ।
सप्तकोशी नदीको आएको बाढी मानवबस्तिमा पस्दा हनुमाननगर कङ्कालनी नगरपालिकाका ६ सय परिवार बिस्थापित भएका छन् ।
पाइलट च्यानलमार्फत् भारतले नदीको धार परिवर्तन गराएपछि पाँच दिन अगाडि सप्तकोशी नदीमा आएको बाढी सप्तरीका मानवबस्तीमा पसेको थियो ।
बाढीले हनुमाननगर कङ्कालिनी नगरपालिका र तिलाठी कोइलाठी गाउँपालिकामा पाँच दिनदेखि डुबानमा परेको छ ।
बस्ती नजिकैको विद्यालय समेत डुवानमा परेपछि बाढीपीडित नजिकैको कृषि सेड तथा सडकमा त्रिपालमुनि बस्न बाध्य छन् ।
कोशी नदीमा आएको बाढीले हनुमाननगर कङ्कालिनी नगरपालिका– ६ का ५४० परिवार प्रभावित भएका छन् । प्रभावित परिवारमध्ये करीब २ सय परिवार कोशी नदीको पश्चिमी बाँधमा अस्थायी शिविर बनाएर बसेका छन् ।
बस्तीमा पानी छिरेपछि हनुमाननगर कङ्कालिनी नगरपालिका–१२ की तीन दिनकी सुत्केरी सहनाज खातुन आफ्नै घरमा थुनिएकी छन् । बाढीले चारैतीरबाट घर घेरेपछि त्रासपूर्ण दैनीकि बिताउन बाध्य छिन् ।
तिलाठी कोइलाडी गाउँपालिका–४ कोइलाडी र वडा नं ५ को बर्साइनमा पनि ३० परिवारको घर डुबानमा परेको छ ।
बाढी प्रभावित वडामा खुल्लै दिसापिसाव गर्ने गरिएको कारण खानेपाटीमा बाढीले उक्त फोहर मिसाईदिएपछि हैजा फैलनसक्ने त्रास पनि बढेको छ । बीस वर्षपछि सप्तकोशीको बाढी यस बस्तीमा पसेको स्थानीय बासिन्दाको भनाइ छ ।
यसैबीच सप्तरीको राजगढ गाउँपालिका– ३ स्थित पोखरीमा डुबेर एक बालकको मृत्यु भएको छ ।
मृत्यु हुनेमा स्थानीय बैजनाथ यादवको १० वर्षीय छोरा त्रिभुवन यादव रहेको जिल्ला प्रहरी कार्यालय सप्तरीले जनाएको छ ।
सोही ठाउँमा रहेको पोखरीमा नुहाउने क्रममा आईतवार साझ बालकको डुबेर मृत्यु भएको प्रहरीले जनाएको छ ।
