१४ भदौ, काठमाडौं ।
भारतीय प्रधानमन्त्री नरेन्द्र मोदीलाई कालोझण्डा देखाउने योजना बनाएको भन्दै ग्रेटर नेपाल अध्यक्ष फणिन्द्र नेपाललाई प्रहरीले गिरफ्तार गरेको छ ।
नेपाललाई सादा पोशाकमा आएका प्रहरीले बिहीबार बिहान निवासबाटै गिरफ्तार गरेको हो । ‘अध्यक्ष नेपाललाई बिहीबार बिहानै चावहिल घरैबाट सादा पोशाक आएको सात जनाको टोलीले गिरफ्तार गरी लगेको हो’ गे्रटर नेपालका महासचिव रामचन्द्र खडकाले भने । महासचिव खडकाले गिरफ्तार हर्कतको निन्दा गरे । साथै तुरुन्त रिहा गर्न सरकारसँग माग गरेका छन् ।
आज मोदी आउने समयमा विमानस्थल बाहिरको सडकमा कालो झण्डा देखाउने तयारी गरेको सूचना प्राप्त भएको भन्दै गिरफ्तार गरी हिरासतमा राखिएको जनाइएको छ ।
ग्रेटर नेपालले सुगौली सन्धि अघिका सबै भू–भाग भारतले फिर्ता गर्नुपर्ने माग राख्दै निरन्तर संघर्ष गर्दै आइरहेको छ । यसअघि मोदी नेपाल भ्रमणमा आएका बेला त्रिभुवन अन्तर्राष्ट्रिय विमानस्थलमा कालो झण्डासहित विरोध प्रदर्शन गरेको थियो । उक्त प्रदर्शनका क्रममा ग्रेटर नेपालका महासचिव रामचन्द्र खडकासहितलाई एयरपोर्टबाटै गिरफ्तार गरी पछि रिहा गरिएको थियो ।
यस अघि भारतीय प्रधानमन्त्री मोदी जनकपुर र मुक्तिनाथको धार्मिक भ्रमणमा आउँदा पनि दाहाललाई प्रहरीले पक्राउ गरेर तीन दिन हिरासतमा राखेपछि रिहा गरेको थियो । उनलाई यो पटक पनि विमस्टेक सम्मेलन अवधिभर थुनामै राख्ने जानकारी प्रहरी स्रोतले दिएको छ ।
