काठमाडौं, भदौ १३ ।
विम्स्टेक शिखर सम्मेलनमा ट्राफिक व्यवस्थापन सहज बनाउन काठमाडौं उपत्यकाका सबै सवारी साधनमा आजदेखि जोर बिजोर प्रणाली लागू भएको छ ।
चार पाङ्ग्रे निजी तथा सार्वजनिक सवारी साधनमा मात्र नभएर दुई पाङ्ग्रे मोटरसाइकलमा समेत यो नियम लागू भएको छ ।
आज, भोलि र पर्सि उपत्यकाभित्र चल्ने सम्पूर्ण निजी तथा भाडाका सवारी साधनमा ट्राफिक प्रहरीले जोर बिजोर प्रणाली लागू गर्ने भएको हो ।
नियम अनुसार आज विजोर सवारी साधन मात्र चल्न पाउने महानगरीय ट्राफिक प्रहरी महाशाखाका एसपी नवराज लम्सालले जानकारी दिनुभयो ।
उहाँका अनुसार सरकारी प्रयोजनका लागि प्रयोग हुने अत्यावश्यक बाहेकका सवारी, कुटनीतिक नियोगका सवारीमा पनि यो नियम लागू हुने छ ।
भोलि जोर नम्बर भएका सवारी साधनमात्र चल्ने छन्। अत्यावश्य र प्रेस प्रतिनिधिलाई भने यो नियम लागू हुनेछैन । उपत्यकाभित्र मात्र १३ लाखभन्दा बढी सवारी साधन गुड्ने गरेको प्रहरीको तथ्याङक छ ।
यो नियम लागू भएपछि सडकमा आधा सवारी साधनको संख्या घट्ने छ । नियम नमानी सवारी चलाएमा दिनभर ट्राफिक प्रहरीले नियन्त्रणमा लिने र ५ सय रुपैयाँ जरिवाना लिइने एसपी लम्सालले बताउनु भयो ।
राति १० देखि बिहान ६ बजेसम्म भने सबै सवारीसाधन निर्वाध रूपमा सञ्चालन हुन पाउनेछन् ।
