काठमाडौं, भदौ ९ । बिमस्टेकको चौथो शिखर सम्मेलन अबधिभर राजधानीमा निजी तथा भाडाका सवारी साधनलाई जोर–बिजोर नम्बरका आधारमा सञ्चालन गर्ने व्यवस्था गरिएको छ ।
सम्मेलनमा बिमस्टेक सदस्य राष्ट्रका सरकार र राष्ट्रप्रमुख सहभागी हुने भएकाले तीन दिन उपत्यकाको सवारी आवागमनलाई सहज र व्यवस्थित तुल्याउन जोर–बिजोर नम्बर प्रणाली लागू गरिएको महानगरीय ट्राफिक प्रहरी महाशाखाले जनाएको छ ।
भदौ १३ गतेदेखि १५ गतेसम्म तीन दिन उपत्यकाभित्र चल्ने सम्पुर्ण निजी तथा भाडाका सवारी साधनमा जोर–बिजोर प्रणाली लागु गरिएको महाशाखाले जनाएको छ ।
जसअनुसार भदौ १३ र १५ गते बिजोर नम्बर प्लेटका सवारी साधनमात्र सञ्चालन गरिने भएको छ भने भदौ १४ गते जोर नम्बर प्लेटका सवारी साधनमात्र सञ्चालन हुन पाउनेछन् ।
सवारी साधनको अन्तिम दुई अंकको आधारमा जोर र बिजोर छुट्याईने महाशाखाले जनाएको छ ।
