जकार्ता, भदौ ९ । इन्डोनेसियामा जारी १८ औं एसियाली खेलकुदअन्तर्गत एथ्लेटिक्सका खेलहरु आजबाट सुरु भएका छन् ।
जकार्तास्थित गेलोरा बुङ कार्नो रंगशालामा आज बिहान भएको म्याराथनतर्फ नेपालका दुबै खेलाडीले निराशाजनक प्रदर्शन गरेका छन् ।
म्याराथनमा सहभागी नेपालका खेलाडीद्वय कृष्णबहादुर बस्नेत र गोपिचन्द्र पार्कीले निर्धारित ४२.१९५ किलोमिटरको दुरी पूरा गर्न सकेनन् । बस्नेतले ४० किलोमिटरपछि दौड छोडे भने पार्कीले ३० किलोमिटरमै रेसबाट बाहिरिए ।
एसियन गेम्सको म्याराथनमा जापानका हिरोतो ईनेईले स्वर्ण पदक जितेका छन् । उनले निर्धारित दुरी २ घण्टा १८ मिनेट २२ सेकेण्डमा पूरा गरे । समान समयमा दौड सकाएका बहराईनका एल हसन एलाबासी दोस्रो हुँदा चीनका बुएदुओले कास्य पदक हात पारे ।
२१ खेलाडी सहभागी म्याराथनमा जम्मा १५ खेलाडीले मात्रै दौड पूरा गरेका थिए । एसियन गेम्सको एलेटिक्सतर्फ नेपालका कुल ६ खेलाडी सहभागी छन् ।
