बैतडी, ८ भदाै । अबदेखि एकल पुरुषले पनि ‘विदुर भत्ता’ पाउने भएका छन् ।
सरकारले एकल महिलालाई भत्ता दिइरहेको अवस्थामा बैतडीको मेलौली नगरपालिकाले एकल पुरुषलाई पनि भत्ता दिने निर्णय गरेको नगरपालिकाकी उपप्रमुख राधा ओझाले बताइन् ।
‘६० वर्ष नाघेका वृद्धहरु समस्यामा परिरहेको गुनासो व्यापक आउने गरेको छ त्यसैले नगर कार्यपालिकाबाट ६० वर्षदेखि ७० वर्षसम्मका एकल पुरुषलाई भत्ता दिने निर्णय गरेका हौं,’ उपप्रमुख ओझाले भनिन– ‘यसले गर्दा वृद्धहरु खुशी भएका छन् ।’
‘वृद्धहरुको अवस्था हेर्दा केहीका छोराछोरी हुँदैनन्, कसैका छोराछोरी भए पनि ख्याल–खबर गर्दैनन्,’ उनले भनिन्– ‘र, यस्ता समस्यामा परेका व्यक्तिहरु हाम्रो नगरपालिकामा धेरै भएकाले विदुर भत्ता दिने निर्णय गरेका हौं ।’
७० वर्षपछि भने सरकारले नै वृद्धभत्ता दिने भएकाले नगरपालिकाले भत्ता नदिने (कटौती गर्ने) उनले बताइन् । साउनदेखि लागू हुने गरी विदुर भत्ता वितरण गरिने उपप्रमुख ओझाले बताएको खबर शुक्रबारको राजधानी दैनिकमा प्रकाशित छ ।
