३ भदौ, काठमाडौं ।
नेपाल कम्युनिस्ट पार्टीका प्रवक्ता खडगबहादुर विश्वकर्मा ‘प्रकाण्ड’लाई सर्वोच्च अदालत परिसरबाट गिरफ्तार गरेको घटनाको कानून व्यवसायीहरुले मात्र नभई मानव अधिकारकर्मीहरुले विरोध गरेका छन् ।
शान्ति समाजले आइतबार आफ्नो फेसबुक पेजमासम्मानित न्यायालयको आदेशमा रिहा भएका व्यक्तिलाई अदालत परिसरबाटै गिरफ्तार गर्ने सरकारको कार्यलाई गलत भएको धारणा सार्वजनिक गरेको हो । गिरफ्तारकोे विपक्षमा मत राखेको छ ।
‘नेत्रविक्रम चन्द ’विप्लव’ नेतृत्वको नेकपाका प्रवक्ता खड्ग बहादुर विश्वकर्मा ’प्रकाण्ड’ लाई २०७५ भदौ १ गते सर्वोच्च अदालत परिसरबाट प्रहरीले पुनः गिरफ्तार गरेको घटनाप्रति मानव अधिकार तथा शान्ति समाजको ध्यानाकर्षण भएको छ’ पेजमा भनिएको छ ।
यो गिरफ्तारले दस वर्षे जनयुद्ध (सशस्त्र द्वन्द्व)को बेलाका मानवअधिकार उल्लंघन र ज्यादतिका घटनाको पुनरावृत्ति भएको संकेत मिलेको शान्ति समाजको भनाई छ ।
भनिएको छ– ‘सर्वोच्च अदालतले रिहा गर्ने आदेश दिए लगत्तै सर्वोच्च अदालत परिसरबाटै निजलाई प्रहरीले पुनः पक्राउ गर्नु गलत हो । २०५२ सालपछि द्वन्द्वकालिन अवस्थामा द्वन्द्वरत पक्षहरुले गरेका मानव अधिकार उल्लंघन र ज्यादतिका घटनाहरुको पुनरावृत्तिको संकेत देखिनु दुर्भाग्यपूर्ण छ ।’
कानूनी शासन, अन्तराष्ट्रिय मानव अधिकार र मानवीय कानूनको सदैव सम्मान र पालनामा जोड दिँदै अभियानरत रहँदै आइरहेको उल्लेख छ । मानवअधिकार रक्षाका लागि क्रियाशील शान्ति समाज जस्तोसुकै अवस्थामा पनि मानअधिकार, लोकतन्त्रको मूल्यहरुको रक्षाको खातिर अभियानरत रहने समाजले प्रतिवद्धता जनाएको छ ।
