लहान।
लहान जिल्लाको कर्जन्हा नगरपालिकाको केन्द्र विवाद अझै मिल्न सकेको छैन । तत्कालीन माओवादी केन्द्रबाट निर्वाचित मेयर गंगा पासवान र उपमेयर ज्ञानकुमारी श्रेष्ठबीच केन्द्रको विषयमा विवाद बढेपछि दैनिक प्रशासनिकसहित विकास निर्माणका काम प्रभावित भएका छन् ।
मेयर र उपमेयरको विवादले दैनिक प्रशासनिक कामसमेत प्रभावित हुँदा नगरसभाबाट पारित भएका दुई सय ४३ मध्ये धेरैजसो योजना कागजमै सीमित छन् । नगरपालिकाले छनोट गरेको नगर क्षेत्रको सार्वजनिक जग्गा छेकबार, थल्हा–गौताडी सडकमा कल्भर्ट, जिवापुलनजिकै कृषि बजार, नगर क्षेत्रका बजारमा सोलारबत्ती जडानजस्ता विकास निर्माणका काम थालनी नै भएका छैनन् ।
नगरसभाबाट छनोट भएका वडास्तरीय विकास निर्माण तथा लक्षित वर्गको कार्यक्रमको भुक्तानीसमेत बाँकी छ । नयाँ आर्थिक वर्षको पहिलो महिना बित्दै गर्दा चारवटा वडाको गरी ६८ लाख रुपैयाँ भुक्तानी रोकिएको वडाध्यक्षहरूको गुनासो छ ।
छुट्टाछुट्टै नागरिक समाज
मेयर र उपमेयरको पक्षमा नगरवासी विभाजित भएका छन् । प्रेसविज्ञप्ति र ज्ञापनपत्र पेस गर्ने विषयमा पनि होडबाजी चलेको छ ।पुराना राजनीतिकर्मीसमेत रहेका स्थानीय रामअवतार राईको संयोजकत्वमा गठन गरिएको १९ सदस्यीय समितिले १७ साउनमा उपमेयर श्रेष्ठको नेतृत्वमा नगरस्तरीय बजेट, योजना स्टिमेट र खर्चको विवरण माग गर्दै मेयरलाई ६ बुँदे ज्ञापनपत्र बुझाएको थियो । त्यसलगत्तै मेयर पासवान पक्षधर मानिने कुशेश्वर महतो संयोजक रहेको कर्जन्हा नागरिक समाजले २१ साउनमा नगरपालिकाको केन्द्र कर्जन्हा गाउँमै राख्नुपर्नेलगायत मागसहित नगरपालिकामा ज्ञापनपत्र बुझायो ।
कसरी भयो विवाद
स्थानीय तहको दोस्रो चरणको निर्वाचन हुनु करिब एक महिनाअघि नगरपालिकामा रूपान्तरण भएको कर्जन्हाको केन्द्र अहिले भएको बगाहा गाउँमै तोकिएको थियो । स्थानीय तहको निर्वाचनपछि नगर कार्यपालिकाको पहिलो बैठकले आव ०७४/७५ सम्मका लागि कर्जन्हास्थित भाडाको भवनमा कार्यालय सञ्चालन गर्ने गरी निर्णय गरेको मेयर पासवान बताउँछन् । त्यसपछि स्थानीय बागबहादुर मगर र ओमप्रकाश महतोले उच्च अदालत जनकपुर राजविराज इजलासमा नगरको केन्द्र साबिककै ठाउँमा रहनुपर्ने माग गर्दै रिट हालेपछि अदालतले राजपत्रमा तोकिएकै ठाउँमा केन्द्र राख्न परमादेश जारी ग-यो ।
अदालतको आदेशपछि भाडाको भवनबाट कार्यालयका सामान सारेर पुनः बगाहामै कार्यालय सञ्चालन गरिएको छ । कर्जन्हा र बगाहा नगरपालिकाको ११ नम्बर वडामै पर्छन् । नगरको कार्यालय भवन निर्माणका लागि कर्जन्हास्थित जनसेवा माविको उत्तरपट्टि स्थानीय अगुवाले नौ कट्ठा १६ धुर जग्गा उपलब्ध गराएका छन् ।
नगरपालिकाको केन्द्र अहिले भएकै स्थान बगाहामा कायम गर्नुपर्ने उपमेयर श्रेष्ठको अडान छ भने मेयर पासवान तत्कालीन गाविस कार्यालयमा सञ्चालित कार्यालय साँघुरो भएकाले कर्जन्हा बजारमा सार्नुपर्ने तर्क गर्छन् ।नयाँपत्रिकाबाट
