डडेलधुरा, साउन २७ ।
१९ औं अन्तराष्ट्रिय युवा दिवसको अवसरमा प्राज्ञिक विद्यार्थी परिषद् नेपालको डडेलधुरका इकाइले आज शान्तिपूर्ण र्याली निकालेको छ ।
विद्यार्थी परिषद्ले र्याली मार्फत वर्तमान परिवेशमा मुलुकमा बढदै गइरहेको महिला मािथ हुने गरेको हिंसाको अन्त्यको माग गरेको छ ।
डडेलधुराको तुफान डाडा बाट सुरु भएको र्याली बागबजारमा पुगेर कोणसभामा परिणत भएको थियो । उनीहरुले नारीको सम्मान र सुरक्षा देशको रक्षा भन्ने नारालाई जोड दिएका थिए ।
साथै विद्यार्थी परिषदले हालै कन्चनपुरमा १३ वर्षीया बालिका निर्मला पन्तमाथि बलात्कार गरि हत्या गरेको भन्दै त्यसको विरोध तथा पिडितलाई न्याय र दोषीलाई यथाशीघ्र कारबाहीका माग राख्दै विरोध र्याली निकालेको हो ।
यस्तो प्रकारको घृणित कार्यले मुलुकभरकै नारी सुरक्षामाथि प्रश्न चिन्ह खडा भएको विद्यार्थी परिषदले औल्याएको छ ।
बलात्कारीलाई तत्काल कारबाहीको दायरामा ल्याउन पनि सरोकारवाला निकाय समक्ष विद्यार्थी परिषदले माग गरेको छ ।
कोणसभालाई सम्बोधन गर्दै विद्यार्थी परिषदका युवा नेता बलदेब जोशी, प्रदिप भट्ट, संगिता कैनी , सानू चतौत , चन्द्रशेखर जोशी र करण साउद लगायतले महिलामाथि हुने गरेको बलात्कार लगायत अन्य हिंसा कम गर्न सरकारले तत्काल पहल कदमी पाइला चाल्नु पर्नेमा जोड दिएका छन् ।
साथै उनीहरुले सरकारले यस्तो सकारात्मक पहल चाले सवै युवा तथा विद्यार्थी परिषद सदैव साथ दिन तयार रहेको बताएका छन् ।
