काठमाण्डौ, २६ साउन ।
नेकपा निकट अखिल नेपाल किसान संघ( क्रान्तिकारी)ले पनि पार्टीका प्रवत्ता प्रकाण्ड सहितका नेताहरुको गिरफ्तारीप्रति आपत्ति जनाएको छ ।
संघकि अध्यक्ष सविता सिंहले बिज्ञप्ती जारी गरि फरक राजनितिक विचार भएकै आधारमा प्रकाण्ड सहित नेकपाका नेता कार्यकर्तालाई गिरफ्तार गरि झुठा मुद्धा लगाएर फसाउने कार्य भएको भन्दै बिरोध जनाउनु भएको हो । वर्तमान सरकारले राज्य आतंक मच्चाईरहेको भन्दै उहाँले यस्तो कार्य बन्द गर्न माग गर्नुभयो ।
उहाँले गिरफ्तार सबै जनालाई बिना सर्त रिहा गर्न पनि माग गर्नुभएको छ । राज्यले जनताका नैसर्गिक अधिकारको हनन गर्दै दमनलाई जारी राखे त्यसबाट उत्पन्न परिणाम स्वयम वर्तमान सरकारले भोग्न बाध्य हुने पनि अध्यक्ष सिंहको चेतावनी छ ।
केपि ओली नेतृत्वको सरकारले नेकपामाथिको धरपकड र दमनलाई बन्द नगरे नेकपाले पनि बन्दुकको जवाफ बन्दुकबाटै दिन बाध्य हुने समेत उहाँले चेतावनी दिनुभयो ।
साथै पार्टीले घोषणा गरेका नेपाल बन्द सहितका संघर्षको कार्यक्रममा सहभागी भई सफल बनाउन पनि अपिल गर्नुभएको छ । प्रवक्ता प्रकाण्डलाई पार्टीको नियमित काममा रहेका बेला यही साउन २२ गते गाडीबाट आउने क्रममा काठमाडौंको चोभारबाट साँझ साढे सात बजेतिर प्रहरीले अपहरण शैलीमा गिरफ्तार गरी झण्डै पन्ध्र घण्टा बेपत्तापछि अहिले हिरासतमा राख्दै आइरहेको छ ।
