चितवन, साउन २१ ।
निरन्तरको वर्षापछि खसेको पहिरोले अवरुद्ध नारायणगढ मुग्लिन सडक एकतर्फी खुलेको छ । सडक खण्डको जलवीरे र घुमाउनेमा खसेको पन्छाएपछि सडक एकतर्फी सञ्चालनमा आएको हो ।
अवरुद्ध सडक एकतर्फी सञ्चालनमा आएसँगै रोकिएका सवारीहरु आलोपालो गरेर पार गराइएको चितवन जिल्ला ट्राफिक प्रहरी कार्यालयका प्रमुख प्रहरी निरीक्षक वेदप्रसाद गौतमले जानकारी दिनुभयो ।
यी दुवै ठाउँमा चार दिनयता पहिरो खस्दा सवारी आवागमन प्रभावित हुँदै आएको छ ।
घुमाउने र जलबिरेमा केही दिनयता लगातार पहिरो खसिरहेको छ ।
नारायणगढ मुग्लिन सडकलाई एसियाली मापदण्ड अनुरूपको दुई लेनको फराकिलो सडक बनाउन ठाउँ–ठाउँमा पहाड काटिएको छ ।
पहाड काटेको ठाउँमा पानी परेपछि पहिरो खसेर सडक नै अवरुद्ध हुने गरेको छ ।
राजधानी र पर्यटकीय सहर पोखरालाई देशको पुर्व र पश्चिम भागसँग जोड्ने मुख्य सडक नै अवरुद्ध हुँदा दैनिक रुपमा १० हजार भन्दा बढी सवारी र सयौं यात्रु समस्यामा पर्ने गरेका छन् ।
उता पृथ्वी राजमार्गको मुग्लिन नौबिसे सडकखण्डअन्तर्गतको फिस्लिङमा आज बिहान पौने ७ बजे पहिरो खसेपछि सडक अवरुद्ध भएको छ ।
पानी परिरहेकाले पहिरो पन्छाउन कठिन भएको प्रहरीले जनाएको छ ।
