उपचारका क्रममा एक विद्यार्थीको मृत्यु भएपछि विद्यार्थीले भैरहवास्थित यूनिभर्सल कलेज अफ मेडिकल साइन्स शिक्षण अस्पताल तोडफोड गरेका छन् ।
आन्दोलनका क्रममा आक्रोशित विद्यार्थी अस्पताल परिसरमा नाराबाजी र तोडफोडमा उत्रिन थालेपछि अस्पतालको वातावरण तनावपूर्ण बनेको हो। अस्पतालमा प्रहरीको परिचालन गरिएको छ।
उक्त कलेजको बीडीएस चौथो वर्षमा अध्ययनरत २४ बर्षीय महादेव साह नामका विद्यार्थीको उपचारको क्रममा आइतबार बिहानै अस्पतालमा मृत्यु भएको थियो।
धनुषाको जनकपुर नजिकैको पतनुका गाँउपालिका घर भएका साहको मृत्यु अस्पताल प्रशासन र चिकित्सकको लापरबाहीबाट भएको आरोप लगाउदै कलेजका सबै विद्यार्थी आन्दोलित भएका हुन्।
पिलो आएपछि उपचारका क्रममा शनबिार राति १० बजेतिर अस्पतालको इमर्जेन्सीमा भर्ना भएका साहको उपचारका क्रममा अपनाइनुपर्ने विधि नअपनाइएको र अनकलमा पनि दक्ष चिकित्सक नआएको आरोप आक्रोशित विद्यार्थीको छ।
अस्पताल व्यवस्थापन पक्षले भने उनको उपचारमा कुनै कमी हुन नदिइएको र उनी अस्पतालमा भर्ना हुँदा नै शरिरका विभिन्न अंगले काम गर्न छाडिसकेकाले बचाउन नसकिएको दावी गरेको छ।
आक्रोशित विद्यार्थी समूहले अस्पतालको विरुद्धमा नाराबाजी गर्दै अस्पतालको आइसीयू, सीसीयूको प्रवेशद्वार, झ्याल ढोका टिभी, पंखा फुटाएका छन्।
विद्यार्थीले समाचार संकलनका लागि अस्पतालमा पुगेका सञ्चारकर्मीहरुसँगपनि दुव्र्यवहार गर्दै टिभी क्यामेरा फोरिदिएका छन्। उनीहरुले पत्रकारले खिचेको तस्बिर डिलिट गराएका थिए।
पत्रकारको एक समूह आइतबार नै रुपन्देहीका प्रमुख जिल्ला अधिकारी समक्ष डेलिगेशन गई पत्रकारहरुमाथि गरिएको दुर्व्यवहार र क्यामेरा फोरिएको घटनाप्रति ध्यानाकर्षण गराउदै दोषीको पत्ता लगाइ कारबाही र क्षतिपूर्तीबारे लिखित माग गरेको छ।
