काठमाडौं, साउन १६ ।
प्रस्तावित प्रधानन्यायाधीश दीपकराज जोशीलाई भावि प्रधानन्यायधिश बनाउने कि नबनाउने भन्नेबारे निर्णय गर्न आज संसदीय सुनुवाई समितिको बैठक बस्दै छ । त्यसका लागि सुनुवाई समितिको बैठक अपरान्ह साढे ३ बजेका लागि बोलाइएको छ ।
सुनुवाइ भएको ६ दिन भैसक्दा समेत समितिले ठोस निर्णय गर्न सकेको छैन । जन्ममिति, सर्टि्फिकेट र यसअघिका फैसला समेत विवादास्पद देखिएपछि सत्तारुढ दल नेकपा जोशीको नाम अनुमोदन नगर्ने पक्षमा छ । तर यसबारे प्रतिपक्षी कांग्रेस भने अझै स्पष्ट भैसकेको छैन ।
जोशीको सुनुवाई गत बिहीबार नै सकिए पनि त्यस पछिको बैठक पार्टी्भित्र छलफल गर्नुपर्ने भन्दै समितिका सांसदहरुले पटक पटक स्थगित गर्दै आएका छन् । जोेशीको सर्टि्फिकेटमा जन्ममिति फरक फरक भेटिएको छ ।
जोशीले संसदीय सुनुवाई समितिमा बुझाएको शैक्षिक प्रमाणपत्र नै फर्जी रहेको भन्दै नेकपाका सांसदहरुले कुनै हालतमा प्रधानन्यायाधीशमा सिफारिस गर्न नहुने बताएका छन् । तर कांग्रेस सांसदहरु चाहिँ यसबारे अझै प्रष्ट भैसकेका छन् ।
संसदीय सुनुवाई समितिमा १५ जना सांसद छन् । सुनुवाइ समितिमा नेकपाका नौ र फोरमका एक गरी सत्तारुढ दलको संख्या १० छ । यो सम्पूर्ण सदस्यको दुईतिहाइ मत हो । कांग्रेसका चार र राजपाबाट एकजना सुनुवाइ समितिमा सदस्य छन ।
सकेसम्म सर्वसम्मत अस्वीकृत गर्ने र कांग्रेसले नमाने मात्र सत्तारुढ दलको दुईतिहाइ बहुमतबाट अस्वीकृत गर्ने नेकपाको तयारी छ ।
