रुपन्देही, साउन ११ ।
प्रदेश सभा सदस्यको पारिश्रमिक तथा सुविधासम्बन्धी विधेयकको प्रतिवेदन आज प्रदेश नं ५ को प्रदेश सभा बैठकमा पेश हुँदै छ ।
अधिकांश पदाधिकारी असन्तुष्ट भएपछि प्रदेश ५ मा झण्डै ४ महिनाअघिदेखि अड्कीएका मुख्यमन्त्री, मन्त्री , सभामुख तथा उप सभामुख र प्रदेश सभा सदस्यहरुको पारिश्रमिक तथा सुविधा सम्बन्धी विधेयक सम्भवत आज किनारा लाग्नेभएको छ ।
आज दिउँसो १ बजे प्रदेश सभा सचिवालय बुटवलमा बस्ने बैठकमा संशोधनसहित यी २ वटै विधयेयकको प्रतिवेदन प्रस्तुत हुने सचिव प्रेम भट्टराईले बताउनुभयो । विधेयकमा मुख्यमन्त्रीका लागि ६० हजार ९ सय ७०, मन्त्रीका लागि ५२ हजार राज्यमन्त्रीका लागि र सहायक मन्त्रीका लागि ४७ हजार मासिक सुविधा तोकिएको छ ।
मुख्यमन्त्रीलाई आवश्यकता अनुसार गाडी र आवास सुविधा दिने तथा मन्त्रीहरुलाई एक–एक वटा गाडी र आवास सुविधा दिइने छ । सभामुखका लागि मासिक सुविधा ५३ हजार र उपसभामुखका लागि ५० हजार तोकिएको छ । दुबैलाई गाडी र आवासीय सुविधा समेत छ ।
विपक्षी दलका नेतालाई ५० हजार, संसदीय समितिका सभापतिका लागि ४९ हजार, दलका प्रमुख सचेतकलाई ४७ हजार र प्रदेश सभा सदस्यका लागि ४७ हजार तोकिएको छ ।
आजको बैठकमा प्रदेशसभा सचिवालयसम्बन्धी आन्तरिक मामिला समितिको प्रतिवेदन समेत पेश गर्ने कार्यसूची छ । यस्तै यसअघि चुनिएका ५ वटै संसदीय समितिका सभापतिहरुको सपथ समेत आजै गरिने सचिव भट्टराईले जानकारी दिनुभयो ।
