हातको चुरोट ,
अनि छेउको चियाको कप हेर्दै ,
उ आफ्नो खल्ती छाम्छ ,
र महसुस गर्छ ,
उसको रित्तो गोजीलाई ।
यहाँ हजारौं रित्तिएका गोजीहरु ,
मौकामा चौका हान्न,
पार्टीका झन्डा बोकेर कुद्छन ,
हजारौं रित्ता गोजीहरु ,
एक गिलास रक्सीलाई ,
रित्तिएको मनसँग साटेर नारा लगाउँछन ,
केही रित्ता गोजी ,
साहु सामन्त र ठालुहरुका पछि लाग्छन ,
केही रित्ता गोजीहरु ,
आकाशको तारा गनेर आफ्नो भविष्यको अड्कल काट्छन ,
केही रित्ता गोजीहरु ,
भरिपुर्ण हुने सपना बोकेर परदेश भासिन्छन ,
केही रित्ता गोजीहरु ,
परदेशी फर्किने बाटो हेर्दै जीवन काट्छन ,
केही रित्ता गोजीहरु ,
ब्यस्त छन , सायद उनीहरुको गोजीमा प्वाल छ,
कहिल्यै नभरिने ।
त्यसैले उ निर्धक्कका साथ,
पुन आफ्नो रित्तो गोजी छाम्छ ,
चिया सुरुप्प पार्छ ,
रित्तिदौ गएको चुरोट तान्छ ,
जय होस उसको ,
किनकी उ पुन निर्धक्कका साथ,
आफ्नो रित्तो जीवन चलाइरहन्छ ,
चलाइरहन्छ ……।
