हिजो,
झ्याप्प…….
ल है बत्ती गयो….
तल बसेका काकाले झ्याली पिटे ,
र अन्धकारलाई बोलाएर ,
आफ्नो उपस्थिति दर्शन दिन ,
आए लोडसेडिङ ।
आज,
झ्याप्प……पिलिक….पिलिक…झ्याप्प…..
र फेरि सुरुभयो अन्धकार ,
आफ्नो मोबाइलको सकिदै गएको चार्ज ,
र झोक्राइरहेको ल्यापटप हेरेर ,
टुलुटुलु हेरिरहेको ,
उ एक लोडसेडिङ भक्त ,
आज फेरि बाध्य छ , लोडसेडिङको दर्शन गर्न ।
भोलि ,
हिजो देखी ,
लोडसेडिङले आफ्नो उपस्थिति बाक्लो जनाएको छ ,
त्यसैले, सबैतिर छ झ्याप्प….
झोक्राएर म्याउँ म्याउँ गरिरहेका ,
मोबाइल , ल्यापटप , र अन्य उपकरणमा ,
आक्रोश पोख्दै ,
आफ्नो समय बर्बाद गरिरहेको ,
उ एक सामान्य नागरिक ,
आज पुनः लोडसेडिङको जयजयकार गरिरहेको छ ।
अन्तत:
घडीको काँटा घुमिरहेको छ ,
दिन ढलिरहेको छ ,
रातले छोपिरहेको छ ,
अस्तब्यस्त छन उसका सबै काम ,
र साथमा शुन्यमा विलीन भएका छन ,
उसका सबै विद्युतीय उपकरण ।
धन्य छौ तिमी लोडसेडिङ ,
आफ्नो अन्धकारमय दर्शनले ,
हर नेपालीको मन उज्यालो पारिरहेको छौ ।
जनता यहाँ कर तिरिरहेका थिए ,
तिरिरहेका छन ,
र पुनः तिरिनैरहनेछन ।
त्यसैले आउ तिमी बेलामौकामा ,
घुमफिर गर्दै ,
अनि दर्शन देउ आफ्नो
र धन्य बनाउ जनतालाई ,
जय होस तिम्रो लोडसेडिङ ।।
-अर्जुन दाहाल
