काठमाडौ २१ जेठ ।
कषि, भूमि व्यवस्था तथा सहकारी मन्त्री चक्रपाणी खनालले काठमाडौंको कालिमाटी स्थित तरकारी बजार व्यवस्थित गर्न निर्देशन दिनु भएको छ ।
कालिमाटी फलफूल तथा तरकारी बजारको सोमबार अनुगमन गर्दै मन्त्री खनालले तरकारी बजार अव्यवस्थित भएकाले व्यवस्थित गर्न एक साताको समय दिनु भएको हो ।
मन्त्री खनालले तरकारी र फलफूल बजारमा फोहरमैला र दुर्गन्ध बढेको भन्दै त्यसलाई तत्काल सरसफाई गर्न समेत निर्देशन दिनुभयो ।
दुर्गन्धको संक्रमणले तरकारी बजारमा तरकारी खरिद गर्न आउने मानिस समेत बिरामी पर्ने अवस्था रहेको भन्दै यसलाई ब्यवस्थित गर्न कार्यविधि बनाइने जानकारी दिनुभयो ।
कालिमाटी बजारभित्र रहेका माछा पसलले दुर्गन्ध फैलाएको भन्दै त्यसलाई बालाजुमा सार्ने तयारी भइरहेको पनि मन्त्री खनालले बताउनु भयो ।
तरकारी स्टलहरु भाडामा लिएर अन्य व्यक्तिलाई महँगोमा बिक्री गर्ने परिपाटीको सिन्डिकेट पनि चाँडै तोडिने उहाको भनाइ थियो । मन्त्री नेतृत्वको टोलीले तीन दर्जन पसलको अनुगमन गरेको थियो ।
