सुर्खेत १२ जेठ ।
कर्णली प्रिमिएर लिग (केपिएल) क्रिकेट प्रतियोगिताको उपाधी त्रिभुवन आर्मी क्लबले जितेको छ । सुर्खेतको वीरेन्द्रनगरमा भएको पहिलो केपिएल प्रतियोगितामा रुपन्देही–११लाई ३७ रनले पराजित गर्दै आर्मीले जित हात पारेको हो ।
प्रदेशको अहिले सम्मकै ठुलो धनराशी भएको प्रतियोगितामा टस जितेर व्याटिङ गरेको आर्मीले २० ओभरमा ७ विकेट गुमाएर एक सय ३२ रनको योगफल बनायो । आर्मीका लागि ओपनर सागर पुनले ३८, कप्तान विनोद भण्डारीले २८ र राजेश पुलामीले २२ रनको योगफल बनाए ।
एक सय ३३ रनको लक्ष्य पछ्याउँदै व्याटिङ गरेको रुपन्देहीले १७.५ ओभरमा अलआउट भएर ९५ रन मात्र बनायो । कप्तान शक्ति गौचनले १७, निश्चल चौधरीले २६, सन्दिप सुनारले २४, र शौरभ खनालले १६ रन जोडे ।
त्यस्तै, बलिङतर्फ आर्मीका विक्रम शोवले ३, सुशन भारी र हरीकृष्ण झाले समान २÷२ तथा जितेन्द्र मुखिया र चन्द्र सावदले १÷१ विकेट लिएका थिए ।
प्रतियोगितामा विजेता आर्मीले नगद तिन लाख र ट्रफी आफ्नो पोल्टामा पारेको छ ।
खेलको म्यान अफ दि म्याच आर्मीका विक्रम शोव घोषित भए भने, म्यान अफ दि सिरिज भएका रुपन्देहीका अलराउण्डर सन्दिप सुनारले नगद २५ हजार सहित ट्रफी हात पारे ।
उत्कृष्ट ब्याट्सम्यान आर्मीका सागर पुनले नगद १० हजार सहित ट्रफी प्राप्त गरे भने उत्कृष्ठ बलर बनेका रुपन्देहीका कृष्ण कार्कीले पनि नगद दश हजार सहित ट्रफी प्राप्त गरेका छन् ।
जेठ ३ गते देखि सुरु भएको प्रतियोगितामा विभिन्न चर्चित १० वटा टिमको सहभागिता रहेको थियो ।
