काठमाडौं–वर्षकै प्रतिक्षित फिल्मको रुपमा रहेको फिल्म ‘कृ’को रोमान्टिक फस्टलुक सार्वजनिक भएको छ । पोष्टरमा फिल्मका मुख्य कलाकार अनमोल केसी र ‘डेब्यु’ नायिका अदिती बुढाथोकीको रोमान्टिक मुडलाई देख्न सकिन्छ । अनमोलको सोलो एक्सन रुप प्रस्तुत गरिएको फस्टलुक यसअघि नै सार्वजनिक भइसकेको छ ।
द सुपर काजोल फिल्मस् र सुवास इन्टरटेन्मेन्टले संयुक्त रुपमा निर्माण गरेको फिल्मको ट्रेलर शुक्रबार सार्वजनिक हुँदैछ । फिल्ममा अनमोल केसी, अदिती बुढाथोकी, सरोज खनाल, रुपा राना, अनुपविक्रम शाही, कामेश्वर चौरसियाको अभिनय छ ।
सुवास गिरी र भुवन केसी निर्माता रहेको फिल्ममा सुरेन्द्र पौडेलको निर्देशन छ । माघ २६ गते प्रदर्शनमा आउने यो फिल्मसँग निर्मात्री तथा कलाकार स्वेता खड्काको फिल्म ‘कान्छी’ जुध्ने चर्चा भए पनि ‘कान्छी’ एकसाता पछि सरिसकेको छ । ‘हामी कुनै फिल्मसँग जुध्न आएका थिएनौ । माघ २६ गते हामीले पहिले नै लक गरेको मिति हो । सोही अनुसार हामीले हलहरु पनि पक्का गरिसकेका थियौ ’ निर्माता गिरीले भने ।
