चितवन, मंसिर २८ ।
नेकपा माओवादी केन्द्रका अध्यक्ष पुष्पकमल दाहालले प्रददेश तथा प्रतिनिधि सभा सदस्य निर्वाचनबाट वाम गठबन्धनले बहुमत ल्याउदा मुलुकमा अधिनायकवाद आउछ भनेर गरिएको प्रचार गलत भएको बताउनु भयो ।
नेपाल पत्रकार महासंघ चितवनले जिल्लाबाट निर्वा्चित जनप्रतिनिधिहरुका लागि आज आयोजना गरेको शुभकामना एवं बधाई कार्यक्रममा बोल्दै अध्यक्ष दाहालले यस्तो बताउनु भएको हो ।
वाम गठवन्धनको जितलाई विश्व समुदायले अति नै चासो र गहिरो ध्यानपूर्वक हेरेको भन्दै दाहालले वाम सरकार आउने वित्तिकै छिमेकी मुलुकहरु आत्तिनु पर्ने अवस्था नरहेको बताउनु भयो । उहाँले संविधानको भावना र मर्मभन्दा बाहिर वामपन्थीहरुको सरकार नजाने प्रस्ट पार्नु भयो ।
कांग्रेससहितका केही शक्तिले वामपन्थीले जिते मुलुकमा अधिनायकवाद आउने र निकुंशता जन्मने बताइरहेको बेला दाहालले सबै मिलेर जारी भएको लोकतान्त्रिक संविधान अनुसार नै नयाँ सरकार अघि बढ्ने प्रतिवद्धता जनाउनु भयो ।
अध्यक्ष दाहालले राजनीतिक स्थीरता, आर्थिक विकास र सम्वृद्धिको यात्रातिर देशअघि बढेकोले यसमा सबैको साथ र सहयोग आवश्यक रहेको बताउनु भयो । जनताको सुशासन, समृद्धि र विकासका प्रतिवद्धता एवं संकल्पहरु दृढतापूर्वक पूरा गर्ने दाहालले विश्वास दिलाउनु भाये ।
