२६ मंसिर,काठमाडौं । नेकपा (माओवादी केन्द्र)का अध्यक्ष प्रचण्डले गणतन्त्रको लागि माओवादी एक्लै लडेको बताएका छन् । चुनावपछि एउटा टिलिभिजनलाई अन्तरवार्ता दिँदै प्रचण्डले जनयुद्धकै कारण अहिलेका राजनीतिक उपलब्ध प्राप्त भएको त्यसको लागि माओवादी एक्लैले लडेको बताए ।
‘गणतन्त्र, संघीयता, धर्मनिरपेक्ष, समावेशी, समानुपातिक सबै उपलब्धीहरु संघर्षबाट प्राप्त भएका हुन्, त्यसको लागि मेरो नेतृत्वमा माओवादी एक्लैले लडेको कुरा जगजाहेर छ’ प्रचण्डले भने । माओवादीकै एजेण्डमा देश अगाडि बढेकोले जसले जित्दा पनि माओवादीकै जित भएको जस्तो अाफूलाई लाग्ने गरेको प्रचण्डले भने । उनले नाम नलिएरै नेपालमा राजतन्त्रको अन्त्य र गणतन्त्रसहित अहिलेका राजनीतिक उपलब्धीहरु हासिल हुनेमा काँग्रेस र एमालेलाई विश्वास नलागेको समेत बताए ।
नेपाली काँग्रेसलाई जनता पटक पटक बहुमतको सरकार दिएको तर कम्युनिष्टलाई पहिलो पटक दिएको बताउँदै चुनावको परिणाम चुनौती र अबसर दुबै भएको प्रचण्डले अन्तरवार्ताको क्रममा बताए ।
प्रचण्डले एमालेसँग पार्टी एकता गर्ने प्रक्रिया र सरकार निर्माणसँगै अगाडि बढाउने समेत बताए ।
चुनावको मुखैमा एमाले अध्यक्ष केपी शर्मा ओलीले दिएको अन्तरवार्तामा राजतन्त्रको र अन्त्य र गणतन्त्र स्थापनाको लागि जनयुद्धको भूमिका नभएको बताउँदै शान्तिपूर्ण अान्दोलनबाट भएको बताएका थिए । ओलीले माओवादीले जनयुद्ध सुरु गर्नु राजनीतिक भुल भएको समेत बताएका थिए ।
प्रचण्डले एमालेसँगको चुनावी तालमेलमात्रै अहिलेको परिणाम नअाएको बताए । उनले माओवादी पुनः बलियो बन्दै गएको स्थानीय चुनावले पनि देखाएको दाबी गरे । एमालेसँगको तालमेलले केही सहयोग भने अवश्य गरेको प्रचण्डले बताए ।
जनयुद्धको क्रममा अाफूहरुले मुक्ति र अधिकारको लागि जातीय मुद्दा अघि सारेको बताउँदै प्रचण्डले कतिपयले त्यसलाई अपव्याख्या गरेका कारण जात जाती र समुदायबीच द्वन्द्व बढेको बताए ।
