बैतडी, २२ मंसिर।
प्रतिनिधिसभा र प्रदेशसभा सदस्य निर्वाचन पश्चात् मजदुरीका लागि भारत जानेको सीमा नाकामा लर्को लाग्न थालेको छ ।
हिउँद शुरु भएसँगै अहिले सिमा नाका झुलाटबाट दैनिक दुई सयभन्दा बढी सर्वसाधारण कामका लागि भारततर्फ जाने गरेका सिमा प्रहरी चौकी झुलाघाटले जनाएको छ ।
आफ्नै बारीबाट उब्जेको अन्नले बाह्रैमहिना खान नपुग्ने भएका कारण्ढा यहाँका बासिन्दा भारतमा मजदुरी गर्न जाने गरेका छन् । बाजुराका चीनबहादुर रोकायाले भन्नुभयो– “छ महिना भारतमा काम गरेर फेरि खेती भित्र्याउने बेलामा घर फर्कन्छांै ।”
सुदूरपश्चिमका पहाडी जिल्लाका अधिकांश नागरिक मजदुरीका लागि झुलाघाट नाका भएर भारत जाने गरेका छन् । बैतडीलगायत डडेल्धुरा, डोटी, अछाम, बाजुरालगायत हुम्ला, मुगुका युवा पनि झुलाघाटबाट भारत जाने गरेको झुलाघाट प्रहरी चौकीका प्रहरी नायब निरीक्षक चक्रदेव पाण्डेले बताउनुभयो ।
अहिले खेतबारीको सबै काम सकिएकाले पैसा कमाउन भारत जान लागेको सिमा नाकाबाट भारत जानेहरुले बताएका छन् । देशमा जस्तोसुकै व्यवस्था आएको भए पनि आफूहरुका समस्या कसैले समाधान नगरेको उनीहरुको गुनासो छ ।
