काठमाडौ १८ मंसिर ।
महिला बालबालिका तथा समाज कल्याणमन्त्री विक्रम बहादुर थापाले मुलुकमा राजनीतिक अस्थिरताको अन्त्य गरी जनताको आर्थिक पहुँच विस्तार गर्न लोकतान्त्रिक सरकार आवश्यक रहेको बताउनु भएको छ ।
काठमाडौँ निर्वाचन क्षेत्र नं ७ मा संयुक्त लोकतान्त्रिक गठबन्धनले आज बालाजुमा आयोजना गरेको चुनावी सभामा मन्त्री थापाले राजनीतिक अस्थिरता अन्त्य गरी जनताको आर्थिक पहुँच विस्तार गर्ने योजना लोकतान्त्रिक शक्तिसँग रहेको जिकिर गर्नुभयो ।
मन्त्री थापाले विभिन्न समयमा भएका परिवर्तनलाई संस्थागत गरी देशमा सामाजिक रुपान्तरणका लागि उक्त गठबन्धनलाई जनताले विश्वास गरी मतदान गर्नुपर्नेमा जोड दिनुभयो ।
उक्त क्षेत्रको ग्रामीण भागमा करिब चार हजार भूकम्प प्रभावितलाई सरकारले दिने भनेको रु तीन लाख उनीहरूले प्राप्त गर्न नसकेकामा चिन्ता व्यक्त गर्दै उहाँले उक्त रकम चाँडो उपलब्ध गराउने प्रतिबद्धता समेत व्यक्त गर्नुभयो ।
