काठमाडौ,११ मंसिर ।
पहिलो चरणमा हिजो सम्पन्न प्रदेश तथा प्रतिनिधि सभा सदस्य निर्वाचनको अधिकांश स्थानको मतपेटिका संकलन कार्य सकिएको निर्वाचन आयोगले जनाएको छ ।
पहाडि तथा हिमाली गरी ३२ जिल्लाको केहि बाहेक अधिकांश स्थानको मतपेटिका संकलन कार्य सकिएको आयोगका प्रवक्ता नवराज ढकालले जानकारी दिनुभयो ।
हिमाली भेगका केहि स्थानमा मौसमका कारण मतपेटिका संकलन हुन नसकेको उहाँको भनाई छ । यद्धपि भौगोलिक रुपमा विकट रहेका केन्द्रहरुबाट समेत भोलीसम्ममा मतपेटिका संकलन गरिसक्ने गरी काम भइरहेको प्रवक्ता ढकालले जानकारी दिनुभयो ।
उहाँका अनुसार अहिलेसम्म २ हजार ५७ स्थानका मतपेटिका संकलन भइसकेका छन् । ती मतपेटिका संकलन गरेर जिल्ला निर्वाचन अधिकृतको कार्यालयमा कडा सुरक्षाका बीच राखिएको आयोगले जनाएको छ ।
प्रतिनिधिसभा तर्फ ३७ र प्रदेशसभा तर्फ ७४ निर्वाचन क्षेत्र गरी १ सय ११ निर्वाचन क्षेत्रमा हिजो मतदान सम्पन्न भएको हो ।
२ सय ८२ प्रतिनिधिसभा र ४ सय २० प्रदेश सभा तर्फ गरी जम्मा ७ सय २ जनाले उम्मेदवारी दिएका थिए । निर्वाचन आयोगले ३२ वटा जिल्लामा ६५ प्रतिशत भन्दा बढी मत खसेको तथ्यांक सार्वजनिक गरेको छ ।
यसैबीच दोस्रो चरणको प्रदेश र प्रतिनिधिसभा चुनावको सम्पूर्ण तयारी पूरा भएको आयोगले जनाएको छ ।
आगामी मंसिर २१ गते दोश्रो चरणमा निर्वाचन हुने ४५ जिल्लाका सबै निर्वाचन क्षेत्रमा आगामी सोमबारसम्म सम्पूर्ण कर्मचारी खटाइसक्ने आयोगको तयारी छ ।
