रोल्पा, ८ मंसिर । रोल्पामा माओवादी केन्द्रको चुनाव प्रचार टोलीलाई स्थानीयले नियन्त्रणमा लिएका छन् ।
माओवादी केन्द्रका नेता तथा प्रतिनिधि सभा सदस्य उम्मेदवार वर्षमान पुनको प्रचारमा हिडेको टोलीलाई रोल्पाको इरिबाङ-५ केवरीबाट चुनाव प्रचार सामाग्रीसहित नियन्त्रणमा लिएका हुन्।स्थानीयले चुनाव प्रचार टोलीलाई नै प्रचार सामाग्री जलाउन लगाएका थिए ।
अाफूहरुको अनुमति विना गाउँ पसेर जनतामा भ्रम फिजाएकोले प्रचार टोलीलाई नियन्त्रणमा लिएको स्थानीयले बताएका छन् । कब्जामा लिएका प्रचार सामाग्री स्थानीयले अागो लगाएर जलाएका छन् भने प्रचार टोलीलाई फेरि नअाउने सर्तमा छोडिएको बताइएको छ।
ईरिबाङ नेकपा महासचिव विप्लवको गाउँ हो । त्यहाँका जनताले चुनाव खारेज गर्ने भन्दै आफ्ना नेता अरुलाई चुनाव प्रचारप्रसार नगर्न समेत चेतावनी दिएका छन् । आफुहरुको अनुमति बिना उक्त गाउँमा प्रवेश गरी माओवादी केन्द्रले भ्रम फिजाउन खोजेको भन्दै स्थानीय जनता आक्रोशित बनेका थिए ।
ईरिबाङ गाउँ नजिकै केही दिन अगाडि बाम गठबंधनका उम्मेदवारहरु माथि ढुङ्गा मुढा समेत प्रहार भएको थियो ।
