बैतडी, मंसिर ५ ।
पहिलो चरणको प्रदेश तथा प्रतिनिधि सभा सदस्य निर्वाचन आउँन ५ दिन मात्र बाँकी रहेका बेला मतदाताहरु भने कसरी मत हाल्ने भन्दै अन्योलमा परेका छन् ।
मतदाता शिक्षाका लागि राज्यले ठूलो रकम खर्च गरेर मतदाता स्वयंसेवक परिचालन गरेको भएपनि उनीहरुले प्रभावकारी ढंगले काम नगरेका कारण विभिन्न जिल्लाका मतदाताहरु भने कसरी मत हाल्ने भन्ने विषयमा नै अन्योलमा परेका हुन् ।
निर्वाचनको मिति नजिकिएसँगै बैतडिका मतदाता पनि आगामी निर्वाचनमा मत कसरी हाल्ने भन्ने अन्योलमा परेका छन् । जिल्ला निर्वाचन कार्यालय बैतडीले गाउँ – गाउँमा खटाएका मतदाता शिक्षा स्वयंसेवक आफूहरुको गाउँठाउँमा अहिले सम्म नआएको भन्दै मतदाताले गुनासो गरेका हुन् ।
निर्वाचन कार्यालयले खटाएका मतदाता शिक्षा स्वर्यसेवक नागरिकको घरदैलोमा पुगेर मतदान गर्ने तरिका नसिकाउँदा मतदातामा ठूलो अन्योल छाएको हो ।
जिल्ला निर्वाचन अधिकारी माधवप्रसाद फूयालले भने मतदाता शिक्षा स्वयंसेवक सबै नागरिकको घरमा गएर मतदान गर्ने तरिका सिकाइरहेको र नगएको ठाउँमा पनि केहि दिनभित्रै जाने जानकारी दिनुभयो ।
