काठमाडौ १ मंसिर ।
उपप्रधानमन्त्री तथा माओवादी केन्द्रका उम्मेदवार कृष्णबहादुर महरा , निवर्तमान सभामुख ओनसरी घर्ती र बर्षमान पुन लगायतका नेताहरु सवार गाडीमाथि रोल्पामा बम प्रहार भएको छ ।
चुनावी सभालाई सम्बोधन गर्न रोल्पा सदरमुकाम लिवाङ जाँदै गरेका महरा र पुनसहितको चुनावी प्रचार टोलीमाथि रोल्पा लिवाङको भदौरे मन्दिर नजिकैको जंगलमा बम प्रहार भएको हो । महरा , घर्ती र पुन छुट्टाछुट्टै गाडिमा सभार रहेको प्रहरीले जनाएको छ ।
पुनसहितको चुनावी अभियान टोलीलाई बम आक्रमण गरिएको यो तेस्रोपटक हो । घटनास्थल लिवाङदेखि करीब ५ किलोमीटर मात्रै टाढा छ भने नेपाली सेनाको ब्यारेक देखि ३ किलोमीटर टाढा रहेको छ ।
प्रहरीका अनुसार रोल्पा नगरपालिकाको भदौरे मन्दिरदेखि पूर्वमा रहेको खोल्सामा बम प्रहार गरिएको हो। बम प्रहारबाट मानवीय एवं भौतिक क्षति नभएको प्रहरीले जनाएको छ ।
उम्मेदवारको गाडीलाई लक्षित गरी दुई वटा बम प्रहार गरेका थिए । लगत्तै प्रहरीले फायरिङपनि गरेको थियो ।
घटनाबारे अनुसन्धान गर्न र सुरक्षा व्यवस्था गर्न थप सुरक्षाकर्मी परिचालन गरिएको प्रहरी नायब उपरीक्षक ज्ञानेन्द्र फुयालले बताउनु भयो ।
हिजो बिहीबार पनि सिचाइ राज्य मन्त्री अमरसिङ्ह पुन सवार गाडीलाई लक्षित गरी घोडागाउमा बम प्रहार गरिएको थियो।
