काठमाण्डौ , २६ कार्तिक । नेकपा एमाले अध्यक्ष केपी शर्मा ओलीले प्रधानमन्त्री शेरबहादुर देउवाको चर्को आलोचना गर्दै एमालेले लोकतन्त्र संघर्षद्वारा प्राप्त गरेको जिकिर गर्नुभएको छ ।
प्रधानमन्त्री देउवाले काँग्रेसले आगामी प्रतिनिधिसभा र प्रदेशसभाको चुनावमा प्रतिपक्षी (एमाले) दललाई सिध्याउने घोषणा गरेकोप्रति कटाक्ष गर्दै ओलीले लोकतन्त्र एमालेले बम्पर उपहारमा नपाएको जवाफ दिनुभएको हो ।
राजधानीको चाबहिलमा आयोजित विभिन्न पार्टीका नेता तथा कार्यकर्ता एमालेमा प्रवेश कार्यक्रमलाई सम्बोधन गर्दै ओलीले पञ्चायतको अन्त्य गरेर प्रजातन्त्रको पुनस्थापना गर्दै राजतन्त्रको समाप्त गर्न एमालेले ठूलो संघर्ष गरेको बताउनु भयो ।
लोकतन्त्र स्थापनाका लागि भएका संघर्ष एमालेको रगत पसिनामा भएको बताउदै ओलीले आफुहरुलाई कसैले लोकतन्त्रको पाठ सिकाउनु नपर्ने बताउनु भयो ।
प्रजातन्त्र पुर्नस्थापना, पञ्चायतको अन्त्य गर्दै राजतन्त्रको समाप्त गर्न एमालेले ठूलो संघर्ष गरेको तर, त्यो देउवाले नदेखेको भन्दै ओलीले भने, ‘उहाँले बुझ्नुपर्छ लोकतन्त्र हाम्रालागि बम्पर पुरस्कार होइन, कठिन सघर्षबाट आर्जन गरेको व्यवस्था हो ।’
ओलीले फेरि थपे, ‘हामीले पञ्चायत फाल्दा उहाँ लण्डनमा पाउरोटीमा जाम राखेर खाँदै हुनुहुन्थ्यो । लोकतन्त्र हामीलाई कसैले किस्तीमा सजाएर दिएको होइन ।’
