२२ कात्तिक, काठमाडौं । नेपाली कांग्रेस निर्वाचन प्रचार समितिका संयोजक बालकृष्ण खाँडले आसन्न निर्वाचनमा सबैले सोचेको भन्दा पृथक परिणाम ल्याएर कांग्रेसले पूर्ण बहुमतका साथ विजय प्राप्त गर्ने दाबी गरेका छन् ।
एमाले र माओवादीले वाम गठबन्धन बनाएपछि कांग्रेस कमजोर हुने विश्लेषण भइरहेका बेला खाँडले बुधबार राजधानीमा आयोजित पत्रकार सम्मेलनमा आसन्न चुनावमा आफ्नो पार्टीले बहुमत ल्याउने दाबी गरेका हुन् ।
नयाँ पुस्ताको साथ र प्रजातन्त्रका लागि समर्पित पुस्ताको निर्देशनमा कांग्रेसले युवाहरुलाई देशभर परिचालन गर्ने र चुनाव जित्ने उनको दाबी छ ।
नेता खाँडले अघि भने, ‘आजको मिति सम्झना गर्नुस्, मेरो आवाज रेकर्ड गर्नुस् र चुनाव सकिएपछि बहुमत आएन भने म त्यसको जवाफ दिन्छु ।’
उनले भने, कुनै ज्योतिषी हिसावले भनेको होइन । हाम्रो प्रतिवेदनका आधारमा भनेको हो । हाम्रो डेडिकेसनका आधारमा भनेको हो ।’
खाँडले प्रत्यक्ष र समानुपातिकतर्फ कांग्रेसले जित्ने सिटको अनुमानित आँकडा पनि प्रस्तुत गरे ।
उनका अनुसार कांग्रेसले प्रतिनिधिसभाको १६५ मध्ये १५४ सिटमा उम्मेदवारी दिएको छ । स्थानीय तहको पपुलर भोटमा एमाले करिव १२ हजारले अगाडि रहे पनि समानुपातिकतर्फ कांग्रेसकै धेरै मत पाउने उनले बताए ।
भागवण्डाका कारण एमाले र माओवादीले सबै ठाउँमा उम्मेदवारी नै नदिएकाले समानुपातिक भोट घट्ने भन्दै नेता खाँडले अघि भने, ‘समानुपातिकमा कांग्रेसले कम्तिमा ४५ प्रतिशत भोट ल्याउँछ । प्रत्यक्षतर्फ १५४ को ५५ प्रतिशत जित्यौं भने पनि ८० बढी जित्दा सहज बहुमत ल्याउँछौं ।’
