काठमाण्डौ, २१ कार्तिक ।
आसन्न निर्वाचनका लागि गठबन्धन बनाएका नेकपा एमाले र नेकपा माओवादी केन्द्रले आज आफ्नो चुनावी घोषणापत्र सार्वजनिक गरेका छन् ।
‘स्वच्छ निर्वाचन ,लोकतन्त्रको आधार ः सुशासन र समृद्धिका लागि वामपन्थी सरकार’ नारासहित आगामी ५ वर्षमा गर्ने काम समेटेर गठवन्धनले प्रदेश र प्रतिनीधिसभाका लागि चुनावी घोषणापत्र सार्वजनिक गरेको हो ।
वामपन्थी तालमेल र पार्टीको एकता राष्ट्रको ऐतिहासिक आवश्यकता भन्दै विगत ५० वर्षदेखि विभाजित नेपालको कम्युनिष्ट आन्दोलनलाई एकीकृत गर्न राष्ट्रको निर्णायक शक्तिका रूपमा रहेका नेकपा एमाले र नेकपा माओवादी केन्द्रबीच एकीकरण भएको घोषणापत्रमा उल्लेख छ ।
घोषणापत्रमा गरिबीको रेखामुनी रहेकाको संख्या १० वर्षमा शुन्यमा झार्ने, प्रतिव्यक्ति आय ५ हजार डलर र्पुयाउने र १० वर्षमा मुलुकमा २० हजार मेगावट विद्युत उत्पादन गर्ने महत्वकांक्षी योजना समावेश गरिएका छन् ।
एमाले उपाध्यक्ष बामदेव गौतम संयोजकत्वमा गठित घोषणापत्र निर्माण कार्यदलले आगामी २५ वर्षमा नेपाललाई समुन्नत राष्ट्रको स्तरमा र्पुयाउने गरि विकासका योजना र कार्यक्रम समावेश गरेको छ ।
विद्यमान औद्योगिक क्षेत्रहरूलाई आधुनिकिकरण गर्दै १० वर्षमा १० लाख व्यक्तिले रोजगारी प्राप्त गर्ने उद्योगहरु स्थापना गरिने पनि घोषणापत्रमा उल्लेख छ ।
५ वर्ष भित्र पूर्वपश्चिम राजमार्गको समानान्तर विद्युतीय रेलमार्ग देखि रसुवागढी काठमाडौं, पोखरा र लुम्बिनीलाई रेलमार्गले जोड्ने प्रण घोषणापत्रमा गरिएको छ ।
यस्तै हिमाली जिल्ला सदरमुकामलाई चार लेनका सडकमार्फत चीनको सीमानामा जोड्ने, हुलाकी राजमार्ग र मध्यपहाडी राजमार्गलाई चार लेनको बनाएर सञ्चालन गरिने घोषणा पत्रमा उल्लेख छ ।
घोषणापत्र संयुक्त रुपमा सार्वजनिक गर्दै एमाले अध्यक्ष केपी शर्मा ओलीले लोकतन्त्र रक्षाका लागि आपसमा मिलेर जानुपर्ने बताउनुभयो ।
अध्यक्ष ओलीले घोषणापत्रले राष्ट्रियता, लोकतन्त्र, राष्ट्रिय एकता, शान्ति, स्थायित्व र विकासबारे सुनिश्चिता गरेको स्पष्ट गर्नुभयो । उहाँले भन्नुभयो, “यो चुनावको घोषणापत्र होइन, राष्ट्र निर्माणको प्रतिबद्धता हो । गरिबी निवारण, रोजगारी, स्वच्छ वातावरण र दिगो विकासका लक्ष्यपूर्तिका लागि हामीले प्रत्याभूति गरेका छौँ ।”
नेता ओलीले दुनियाँले पत्याउनसमेत गाह्रोपर्ने गरी काम गर्दै आएका दुई पार्टीले तयार गरेको घोषणापत्र भएकाले प्रतिस्पर्धामा उत्रन र सही विचार नलिनेका लागि सहन गाह्रो पर्न सक्ने जिकिर गर्नुभयो ।
उहाँले नेपालका दुवै छिमेकी भारत र चीनसँगको समदूरीको सम्बन्धलाई विकास गर्ने बताउँदै राष्ट्र निर्माण र सन्तानको भविष्य बनाउने कुरामा कोही पनि जिम्मेवारीबाट पछि हट्न नहुने बताउनुभयो ।
यस्तै माओवादी केन्द्रका अध्यक्ष पुष्पकमल दाहालले घोषणा पत्रले मुलुकलाई विकासको बाटोमा र्डोयाउने उल्लेख गर्नुभयो ।
गठबन्धनको साझा घोषणापत्रमा मिडियामा विदेशी लगानी निषेध गर्ने उल्लेख गरिएको छ ।
घोषणापत्रको ‘सूचना प्रविधि र प्रेस स्वतन्त्रता’ शीर्षकको पहिलो बुँदामै मिडियामा विदेशी लगानी निषेध गर्ने उल्लेख गरिएको छ। ‘पूर्ण प्रेस स्वतन्त्रतासहितको लोकतन्त्र’ लागू गरिनेछ। आमसञ्चारमाध्यमलाई निष्पक्ष, व्यावसायिक, उत्तरदायी र जिम्मेवार उद्योगका रूपमा विकास गरिनेछ’, उक्त बुँदामा प्रष्टसँग भनिएको छ, ‘मिडियामा प्रत्यक्ष वा परोक्ष रूपमा विदेशी लगानी निषेध गरिनेछ।’
[gview file=”https://www.mirmireonline.com/wp-content/uploads/2017/11/House-n-Province-election-manifesto22-1.pdf”]
