तनहुँ, कात्तिक १९ । कांग्रेस नेता गोविन्दराज जोशीले आफ्नो उम्मेदवारी रद्द गर्ने निर्वाचन आयोगको निर्णय अप्रजातान्त्रिक र असंवैधानिक भएको जिकीर गर्नुभएको छ ।
तनहुँ क्षेत्र नम्बर १ का उम्मेदवारी दिनुभएका जोशीले आज पत्रकार सम्मेलन गरी आयोगको निर्णयप्रति आपत्ति जनाउनुभयो ।
आयोगको निर्णयले कानुनी शासनको उल्लघंन भएको टिप्पणी उहाँको छ । उम्मेदवारी रद्द गरेको बारेमा सन्चारमाध्यमबाट सुनेपनि आयोगले जानकारी नगराएको जोशीले बताउनुभयो । निर्वाचन आयोग स्वतन्त्र र निष्पक्ष नभएको र सत्ताको प्रभाव र दबाबमा परेर निर्णय गरिएको उहाँको आरोप छ ।
आयोगको निर्णयविरुद्धमा के गर्ने भन्नेमा कानुनविदहरुसँग छलफल भइरहेको उहाँले बताउनु भयो ।
आफूले टिकट नपाएपछि जोशीले सोही क्षेत्रमा उम्मेदवार बनेका नेपाली कांग्रेसका उम्मेदवार रामचन्द्र पौडेलविरुद्ध उम्मेदवारी दिनुभएको थियो ।
जोशीको उम्मेदवारीविरुद्ध पौडेलले दिएको उजुरीमा शनिबार (हिजो) आयोगले उम्मेदवारी खारेज गर्ने निर्णय गरेको थियो ।
