स्याङ्जा कार्तिक १८,।
स्याङ्जाको भीरकोट नगरपालिका–४, का दौबासीहरुले आगामी मंसिर २१ गते हुने प्रतिनिधि र प्रदेश सभाको निर्वाचन बहिष्कार गर्ने बताएका छन् ।
गत वैशाख ३१ गते सम्पन्न भएको स्थानीय तहको निर्वाचन समेत बहिष्कार गरेका जिल्लाका दौबासीले अहिलेको निर्वाचन पनि बहिष्कार गर्ने बताएका छन् ।
स्थानीय तह पुर्नसंरचना विवादको विषयलाई लिएर चुनाव बहिस्कार गरिएको स्थानीयले बताएका छन् । साविकको छाङछाङदी गाविस ७ नम्बर वाडलाई वालिङ नगरपालिकामा गाभ्न माग गरिरहँदा स्थानीय र जिल्ला स्तरका नेताहरुले वालिङमा नै गाभ्न सहमति जनाउँदा पनि अन्तिममा भीरकोट नगरपालिकामा गाभेको विषयलाई लिएर चुनाव बहिस्कार गरेको स्थानीय डिलबहादुर थापाले बताउनु भयो ।
उहाँले ७ नम्बरका सवै वाड बासीहरुले वाड भेलाबाट नै कसैले पनि भोट नहाल्ने सल्लाह भएको बताउनुभयो । स्थानीयबासीन्दाहरुले राज्यलाई तिर्नुपर्ने कर समेत तिरेका छैनन् । थापाले घरको कर, जग्गाको कर लगायत राज्यलाई तिर्नुपर्ने कुनै पनि कर नतिरेको बताउनुभयो ।
स्थानीय तहको पुर्नसंरचनामा भन्दा पूर्व ०५४ साल देखी नै वालिङ गाभ्ने निर्णय भएको यो वाडलाई बारम्बार धोका दिएको उनीहरुको आरोप छ । सिङगो वाडबासीहरुले आफ्नो माग पुरा नभए सम्म राज्यका कुनै पनि कार्य नगर्ने बताएका छन । आर्थिक, भौगोलिक, सामाजिक रुपबाट वालिङ नै नजिक र सहज पर्ने स्थानीयबासीको भनाई छ ।
वालिङ बजार नै उनीहरुको आवतजावतमा सहज पर्छ । डिलबहादुरका अनुसार वालिङ नगरपालिकामा पर्ने जग्गाको राजस्व, कर तिर्दै आएका छन । तर, भीरकोट नगरपालिकामा समेटिएको जग्गाको, घरको कर भने तिरेका छैनन् ।
जिल्ला निर्वाचन कार्यालयको तथ्यांक अनुसार ७ वडामा १ सय ७ मतदाता संख्या थियो । ‘हामी राज्यका जनता जस्ता भएनौं’ स्थानीय भन्छन् , ‘प्रदेश र संघको निर्वाचन राज्यको आफ्नो हो हाम्रो होइन त्यसैले भोट हाल्नुपर्छ भने कुनै बाध्यता पनि छैन् ।’ आफुहरुको माग पुरा नभएसम्म उनी पनि सिमाङकनको विषयलाई आवाज उठाइरहने दावी गरे ।
