काठमाडौं कार्तिक १६, ।
आगामी मंसिर २१ गते दोस्रो चरणमा हुने प्रदेश र प्रतिनिधिसभा निर्वाचनको प्रत्यक्ष तर्फ बिभिन्न दलका शीर्ष नेताहरुले मनोनयन दर्ता गराएका छन् ।
मनोनयन दर्ता गराउन सम्बन्धित निर्वाचन क्षेत्र पुगेका नेताहरु नारा जुलुस सहित मुख्य निर्वाचन अधिकृतको कार्यालय पुगेका थिए । प्रधानमन्त्री समेत रहनुभएका नेपाली कांग्रेसका सभापति शेरबहादुर देउवाले एकमात्र निर्वाचन क्षेत्र रहेको डडेल्धुुराबाट उम्मेदवारी दिनुभएको छ ।
देउवाले आफना सहयोगी गणेशप्रसाद पन्तमार्फत उम्मेदवारी दर्ता गराउनुभएको प्रधानमन्त्रीका स्वकीय सचिव केशवराज जोशीले जानकारी दिनुभयो ।
एमाले अध्यक्ष केपी ओलीले झापा ५ बाट उम्मेदवारी दिनुभएको छ । भने माओवादी केन्द्रका अध्यक्ष पुष्पकमल दाहालले चितवन ३ बाट उम्मेद्वारी दिनुभएको छ ।
कांग्रेस बरिष्ठ नेता रामचन्द्र पौडेलले तनहुँ १ बाट उम्मेदवारी दिदा सोही क्षेत्रबाट कांग्रेसका पुराना नेता गोविन्दराज जोशीले स्वतन्त्र उम्मेदवारी दिनुभएको छ ।
एमाले बरिष्ठ नेता झलनाथ खनालले इलाम १, माधवकुमार नेपालले काठमाडौं २ र सुवासचन्द्र नेम्वाङले इलाम क्षेत्र नम्बर २ बाट उम्मेदवारी दिनुभएको छ ।
उपप्रधानमन्त्री तथा राप्रपा अध्यक्ष कमल थापाले मकवानपुर एकबाट उम्मेदवारी दिनुभएको छ । नेपाली कांग्रेसको सर्मथनमा थापा मकवानपुर क्षेत्र नम्बर एकबाट उम्मेदवार बन्नु भएको हो ।
संघीय समाजवादी फोरमका अध्यक्ष उपेन्द्र यादवले सप्तरी २ बाट उम्मेदवारी दिनुभएको छ भने उहाँविरुद्ध राजपाका सहमहामन्त्री जयप्रकाश ठाकुरले स्वतन्त्र उम्मेदवारी दिनुभएको छ ।
कांग्रेस नेता कृष्ण सिटौला र राप्रपा महामन्त्री राजेन्द्र लिङ्देनले झापा ३ बाट उम्मेदवारी दिनुभएको छ । मोरङ ६ बाट कांग्रेस नेता डाक्टर शेखर कोईरालाको उम्मेदवारी परेको छ भने बाम गठवन्धनका तर्फबाट एमाले नेता लालवाबु पण्डितले उम्मेदवारी दिनुभएको छ ।
मोरङ ४ बाट कांग्रेस नेता महेश आर्चायले उम्मेदवारी दर्ता गर्नुभएको छ ।
