ललितपुर, १५ कार्तिक । नेपाल कम्युनिष्ट पार्टी माओवादी केन्द्र ललितपुरले पार्टीकै उम्मेदवारबिरुद्ध बागी उम्मेदवारी दिने भएका छन् ।
बाम गठबन्धनको सहमति अनुसार सम्मानजनक भागबण्डा नभएको र संस्थापन पक्षलाई वाइपास गरी उम्मेदवार खडा गरेको भन्दै संस्थापन पक्षका नेताहरुले बागि उम्मेदवारी दिने घोषणा गरेका हुन् ।
यसरी टिकटको लागि सिफारिसमा परेकाहरु अधिकांश पार्टी एकीकरण गर्दा बैद्य समूहबाट आएका र पर्यटक नेताहरुलाई केन्द्रले टिकटमा सिफारिस गरेकोप्रति अधिकांश संस्थापन नेताहरु आक्रोशित बनेका छन् ।
यसरी जिल्ला स्तरको निर्णयलाई बेवास्ता गरी बाम गठबन्धनको नाममा पार्टीलाई नै धरासाही बनाउन लागेको भन्दै माओवादी संस्थापन पक्षका नेताहरुले ललितपुरको तीन नम्बर क्षेत्रको प्रतिनिधि सभा, तीन नम्बर क्षेत्रको प्रदेश सभा‘क’ र क्षेत्र नं. १ को प्रदेश सभा ‘क’ मा बागी उम्मेदवार खडा गर्ने पार्टी पोलिटब्यूरो सदस्य, जिल्ला इन्चार्ज समेत रहेका जिल्ला इन्चार्ज हरि दाहालले मिर्मिरे अनलाईनलाई बताएका छन् ।
यदि केन्द्रले संस्थापन पक्षको मागलाई तत्काल सम्बोधन नगरी वेवास्ता गरेको खण्डमा पम्फा भुषालको प्रतिद्वन्द्वीमा पार्टीबाटै राजीनामा दिई सरोज सिंह डँगोलले उम्मेदवारी दिने घोषणा गरिसकेका छन् भने संस्थान पक्षका अन्य नेताहरुले पनि पार्टी परित्याग गरी सबै क्षेत्रमा विद्रोही उम्मेदवार खडा गर्ने बताएका छन् ।
जिउँदा सहिदको रुपमा परिचित हरि दाहाललाई टिकट नदिई पर्यटक उम्मेदवारको रुपमा रहेकी बर्षामान पुनकी बहिनी सुशिला पुनलालाई ललितपुर क्षेत्र नं. १ को ‘क’ मा टिकटको सिफारिस गरेपछि दाहाल पार्टी नै छाड्ने मनस्थितिमा रहेको दाहाल नजिक स्रोतले बताएको छ ।
माओवादी केन्द्र ललितपुरमा टिकट बाँडफाँडमा पम्फा भुषालले आफू अनुकुल हालीमुहाली गरेका कारण पनि ललितपुर माओवादीभित्र असन्तुष्टि छाएको हो ।
ललितपुर दुई नम्बर क्षेत्रका इन्चार्ज समेत रहेका राजकाजी महर्जनलाई ललितपुर क्षेत्र नं. ३ को प्रदेश ‘क’ मा टिकटको लागि सिफारिस गर्दा पाँचौं नम्बरमा परेको भए पनि केन्द्रबाट टिकटको सिफारिस गराउन पम्फा भुषाल सफल बनेकी छिन् ।
स्मरणीय छ, बाम गठबन्धन अनुसार ललितपुर क्षेत्र नं. २ ‘ख’ मा माओवादीका बाबुराजा बज्राचार्यले टिकट पाउने निश्चित भइसकेको अवस्थामा पनि बज्राचार्यबाट रुष्ट बनेकी पम्फा भुषालले अनेक नाटक रची राजकाजी महर्जनलाई केन्द्रबाट टिकटको सिफारिस गराउन सफल बनेको स्रोत बताउँछ ।
तीन नम्बर क्षेत्रको प्रतिनिधि सभा सदस्य र प्रदेश सभा ‘क’ मा भुषाल र महर्जनलाई टिकटको लागि सिफारिस गरेपछि सो क्षेत्रका संस्थापन पक्षका माओवादीहरु रुष्ट बनेका छन् ।
टिकटका लागि सिफारिसमा पर्दा तीन नम्बर क्षेत्रबाट राजकाजी महर्जन पाँचौं नम्बरमा सिफारिस परेका थिए । पाँचौं नम्बरमा सिफारिस परेका महर्जनले केन्द्रबाट टिकटका लागि सिफारिस हुनु भन्दा पहिलेदेखि नै आफू उम्मेदवार भएको भन्दै व्यापक चन्दा असुली गरी आर्थिक अनियमितता गरेको जिल्ला माओवादीकै नेताहरुले बताउने गरेका छन् ।
सोही विषयलाई लिएर पार्टी्भित्र व्यापक आलोचना र विवाद हुन थालेपछि राजकाजीले आफैले ललितपुर क्षेत्र नं. २ को बैठक बोलाएका थिए । तर, सो बैठकमा पार्टीका अन्य नेताहरुले भुषालको पार्टीप्रतिको हस्तक्षेप र महर्जनकै पार्टीप्रति घात हुने विवादित कार्य गरेको कुरा उठ्ने भएका कारण इन्चार्ज समेत रहेका महर्जनले आफैले बोलाएको बैठकमै उपस्थिति नजनाएको एक नेताले बताए ।
ललितपुर क्षेत्र नं. २ मा प्रतिनिधि सभा र प्रदेश सभामा माओवादीबाट कुनै पनि उम्मेदवार नबनाएका कारण कार्यकर्ता तथा नेताहरु रुष्ट बनेकै कारण पार्टी्भित्र बफादार सिपाहीको भूमिका निर्वाह गरी जीवनभर योगदान गरेकाहरु टिकटबाट बञ्चित बन्नुपरेपछि विद्रोही उम्मेदवार खडा गर्ने सोचमा रहेको संस्थापन पक्षका सरोज सिंह डंगोलले बताएका छन् । स्मररणीय छ, पम्फा भुषाल र राजकाजी महर्जन बैद्य माओवादीबाट नेता वादल समुहसँगै माओवादी एकता हुँदा माओवादी केन्द्रमा सँगै प्रवेश गरेका हुन् ।
