काठमाडौँ, ९ कात्तिक ।
सूचना तथा सञ्चारमन्त्री मोहनबहादुर बस्नेतले संविधान कार्यान्वयनसँगै मुलुकलाई आर्थिक विकासको बाटोमा अगाडि बढाउने बताउनुभएको छ ।
काँग्रेस र राप्रपा प्रजातान्त्रिकले संयुक्त रुपमा आयोजना गरेको कार्यकर्ता भेलालाई सम्बोधन गर्दै उहाँले समृद्ध नेपाल निर्माणका लागि आगामी निर्वाचनमा लोकतान्त्रिक गठबन्धनलाई विजयी गराउन आह्वान गर्नुभयो ।
सिन्धुपाल्चोक जिल्लाबाट लोकतान्त्रिक गठबन्धनले जिते मात्र सो क्षेत्रको शिक्षा, स्वास्थ्य, रोजगारी, बाटोको विकास हुने मन्त्री बस्नेतले बताउनु भयो ।
सिन्धुपाल्चोक जिल्लाको प्रतिनिधिसभा क्षेत्र नं १ का उम्मेदवारसमेत रहुनभएका बस्नेतले सरकारले छिट्टै प्रत्येक विद्यालयमा कम्प्युटर र इन्टरनेटको व्यवस्था गर्ने तयारी गरिरहेको समेत जानकारी दिनुभयो ।
राष्ट्रिय प्रजातन्त्र पार्टी (प्रजातान्त्रिक) का अध्यक्ष तथा सिन्धुपाल्चोक जिल्ला प्रतिनिधि सभा क्षेत्र नं २ का उम्मेदवार पशुपतिशम्शेर जबराले आगामी निर्वाचनमा लोकतान्त्रिक गठबन्धनलाई विजयी गराएको खण्डमा मुलुकमा द्रुतगतिमा विकास हुने दाबी गर्नुभयो ।
सिन्धुपाल्चोक जिल्लाबाट प्रदेश सभाका उम्मेदवारहरू निमा लामा, विष्णु खत्री, विकास तामाङ र राजेन्द्र श्रेष्ठले आगामी मंसिर १० गते हुने निर्वाचनमा सिन्धुपाल्चोक जिल्लाबाट आफूलाई मतदान गरी विजयी गराउन आग्रह गर्नुभयो ।
