नेपाली कांगेसले पहिलो चरण अन्तरगत प्रतिनिधिसभा र प्रदेशसभा निर्वाचनमा प्रत्यक्षतर्फ ३२ जिल्लाका उम्मेदवारहरुको टुंगो लगाएको छ ।

पछिल्लो साता लगातार बसेको कांग्रेस केन्द्रीय समिति बैठकले पहिलो चरणमा निर्वाचन हुने ३२ जिल्लामा प्रतिनिधिसभाको ३५ र प्रदेशसभाको ७४ निर्वाचन क्षेत्रका लागि उम्मेदवारको नामावलीलाई अन्तिम रुप दिएको हो ।

काग्रेसले सिन्धुपाल्चोक क्षेत्र नम्बर २ मा राप्रपा प्रजातान्त्रिकका पशुपतिसमशेर राणालाई र गोरखा क्षेत्र नम्बर २ नयाँ शक्तिका डा. बाबुराम भट्टराईलाई सघाउने निर्णय गरेको छ ।

गोरखा क्षेत्र नम्बर एकमा चिनकाजी श्रेष्ठलाई प्रतिनिधिसभा तर्फ प्रत्यक्ष उम्मेदवार बनाउदै कांग्रेसले २ मा भने भट्टराईलाई सहयोग गर्ने निर्णय गरेको हो ।

बामगठबन्धनले गोरखा क्षेत्र नम्बर २ मा माओवादी केन्द्रका बरिष्ठ नेता नारायणकाजी श्रेष्ठलाई उम्मेदवार बनाउने यसअघि नै निर्णय गरिसकेको छ ।

निर्वाचनमा नेता भट्टराईले आफ्नै दलको आँखा चुनाव चिन्ह प्रयोग गर्ने वा रुख नै लिएर सहभागी हुने भन्ने बारे भने निर्णय भईसकेको छैन ।

एमाले र माओवादीले ३२ जिल्लाका सबै सीटहरुमा तालमेल गरेको अवस्थामा कांग्रेसले उनीहरुसँग लगभग एक्लै प्रतिस्पर्धा गर्नुपर्ने अवस्था छ । यद्धपि सिन्धुपाल्चोक २ मा पशुपति समशेरलाई सघाएका कारण सिन्धुपाल्चोक १ मा राप्रपाले कांग्रेस नेता मोहनबहादुर बस्नेतलाई भोट हाल्नेछ ।

ती बाहेक अन्य सबै क्षेत्रमा काग्रेस एक्लै चुनावी मैदानमा उत्रने छ ।