काठमाण्डौ , २९ असोज ।
राप्रपाबाट सरकारमा सहभागी नवनियुक्त मन्त्रीहरुको शपथ आज साँझ ७ बजे राष्ट्रपति भवन शितल निवासमा हुने भएको छ ।
राष्ट्रिय प्रजातन्त्र पार्टी राप्रपाबाट मन्त्री बनेकाहरुलाई साँझ ७ राष्ट्रपति विद्या भण्डारीले शपथ खुवाउने कार्यक्रम तय भएको राष्ट्रपति भण्डारीका स्वकीय सचवि भेषराज अधिकारीले जानकारी दिनुभयो ।
प्रधानमन्त्री शेरबहादुर देउवाले हिजो राप्रपाका अध्यक्ष कमल थापालाई उपप्रधानमन्त्रीको जिम्मेवारी सहित चार मन्त्री र ४ राज्यमन्त्री नियुक्त गर्नुभएको थियो ।
थापासहित राप्रपाबाट दिलनाथल गिरी, जयन्त चन्द र विक्रम थापालाई मन्त्री बनाईएको छ भने राज्यमन्त्रीहरुमा कान्ता भट्टराई, कुन्ती शाही, भास्कर भद्रा र सुशील श्रेष्ठलाई राज्यमन्त्रीमा नियुक्त गरिएको छ ।
नवनियुक्त मन्त्री तथा राज्यमन्त्रीहरुलाई मन्त्रालय भने तोकिएको छैन ।
पछिल्लो पटक मन्त्रीहरु थपिएपछि देउवासरकारको मन्त्रिपरिषद् ६४ सदस्यीय पुगेको छ ।
यो इतिहासकै सबैभन्दा ’जम्बो’ मन्त्रिपरिषद् हो । प्रधानमन्त्री देउवा निर्वाचन आयोगले प्रतिनिधिसभा र प्रदेशसभा निर्वाचनको आचारसंहिता लागू भइरहेको बेला पटक पटक मन्त्रिपरिषद् विस्तार गरेको भन्दै आलोचित बन्नुभएको छ ।
