काठमाण्डौ ,२४ असोज ।
प्रतिनिधिसभा र प्रदेश सभा निर्वाचनका लागि उम्मेद्वारको नाम तय गर्न नेपाली काङग्रेसले ११ सदस्यीय संसदीय बोर्ड गठन गर्ने भएको छ ।
पार्टीको बिधानमा पदाधिकारी र बढीमा ८ मनोनित सदस्य गरी १४ सदस्यीय संसदीय बोर्डको व्यवस्था भएपनि पदाधिकारीमा ३ जना नियुक्त गर्न बाँकी रहेकाले हाललाई ११ सदस्यीय बोर्ड गठन हुन लागेको हो ।
काग्रेस केन्द्रीय सदस्य अर्जुननरसिंह केसीले बोर्ड गठनको जिम्मा सभापतिलाई दिइएकाले उहाँले सहमतिमा निर्णय लिने बताउनुभयो ।
बिधानले पदाधिकारीसहित १४ को व्यवस्था गरेकाले बोर्डलाई पूर्णता दिनुअघि पदाधिकारी नियुक्तिको दबाब देउवामा परेको छ ।
कंग्रेसमा उपसभापति, महामन्त्री र सह–महामन्त्रीमा पदपूर्ति हुन सकेको छैन । पार्टी सभापति शेरबहादुर देउवाले ११ सदस्य मनोनित गरेर बोर्डलाई १४ सदस्यीय बनाउन प्रस्ताव गरेपनि वरिष्ठ नेता रामचन्द्र पौडेल पक्षधरले अस्वीकार गरेका थिए ।
बिधानको व्यवस्था अनुसार बढीमा ८ मनोनित सदस्यमात्रै बोर्डमा राख्न पौडेल समूहले दबाब दिएपछि सभापति देउवा त्यसमा राजी हुनुभएको बालुवाटार स्रोतले जनायो ।
संसदीय बोर्ड गठनमा ढिलाई भएपछि २७ गतेभित्रै प्रदेश र प्रतिनिधिसभा निर्वाचनमा उम्मेदवार बन्नेको टुङ्गो लगाउने कंग्रेसको निर्णय प्रभावित हुने भएको छ ।
लोकतान्त्रिक गठबन्धनमा अटाउने दललाई छुट्टाउने सिट संख्याका बारेमा समेत टुङ्गो लाग्न बाँकी भएकाले कंग्रेसले उम्मेद्वारको संख्या र नामावलीमा विस्तृतमा छलफल गरेको छैन ।
जिल्लाबाट सिफारिश नामलाई आधार मानेर संसदीय बोर्डले उम्मेद्वारबारे अन्तिम निर्णय लिनेछ । यसअघिको कंग्रेस केन्द्रीय समिति बैठकले उम्मेद्वारको टुङ्गो असोज २७ गतेभित्र लगाउने गरी बोर्ड गठनको जिम्मा सभापति देउवालाई दिएको थियो ।
