काठमाडौं , २४ असोज ।
सत्तारुढ दल नेकपा माओवादी केन्द्र र प्रतिपक्षि एमालेबीचको वाम तालमेलपछि चर्चामा आएको सत्ता पुर्नगठन तत्काल नहुने भएको छ ।
सरकारको नेतृत्वकर्ता दल नेपाली काग्रेस नेतृत्वमा रहेको लोकतान्त्रिक गठबन्धनमा आबद्ध दलको आन्तरिक व्यवस्थापन मिल्न नसक्दा सरकार पुर्नगठनको संभावना तत्कालका लागि टरेको हो ।
गठबन्धनमाअ आबद्ध दलहरुलाई मिलाउने प्रधानमन्त्री शेरबहादुर देउवाको प्रयास असफल भएसँगै अहिले नै सरकार पुर्नगठनको सम्भावना नभएको प्रधानमन्त्रीका प्रेस संयोजक गोविन्द परियारले बताउनु भयो । उहाँले सरकारमा आउन केही दल आंकाक्षी भएपनि काङग्रेस र लोकतान्त्रिक फोरमबीच हुने भनिएको एकता समेत अन्यौलमा परेको बताउनुभयो ।
गठबन्धनमा आबद्ध राप्रपा लगायत केहि दल सरकारमा जान तयार भएपनि राष्ट्रिय जनता पार्टी र संघीय समाजवादी फोरमसंग कुरा मिल्न सकेको छैन ।
मुख्य दलबीच ध्रुब्रिकरण बढेसंगै प्रधानमन्त्री शेरबहादुर देउवाले सरकार पुर्नगठनका लागि छलफल अघि बढाउनुभएको थियो । तर कानुनविदले सरकार पुर्नगठन गर्दा निर्वाचन आचारसंहिताले अप्ठेरो पर्ने तथा निर्वाचन नै प्रभावित हुनसक्ने बताएपछि प्रधानमन्त्री देउवालाई सकस परेको छ ।
काङग्रेस र लोकतान्त्रिक फोरमबीच प्रत्यक्ष र समानुपातिक तर्फको सिट संख्यामा सहमति हुन नसकेपछि एकता प्रक्रिया रोकिएको लोकतान्त्रिक फोरम श्रोतले जनाएको छ । यद्यपि दुई दलबीच थप छलफल गरी केहि दिन भित्रै एकता प्रक्रिया अघि बढाईने नेताहरुले बताएका छन् ।
