सुनिल धिताल

सहमति कार्यान्वयनपछि पार्टी एकता भनिएपनि वास्तमा त्यो माके समुहको राजनीतिक पतन र एमालेमा विलय हो । त्यसको मुल्यांकन इतिहासले निर्ममता पुर्वक अवश्य गर्नेछ ।

तथापि गत १७ गतेको सहमति पछि अनुत्तरित बनेका केही प्रश्नको उत्तर तपाइले नाम मात्रको माओवादी पार्टी विघटन गर्नुभन्दा पहिले सहिद परिवार, घाइते योद्धा, खाडी मुलुकमा छरिएका कार्यकर्ता र नेपाली जनताको अगाडि उभिएर दिनुपर्छ । अब उप्रान्त फागुन एक गते जनयुद्ध दिवस मनाइन्छ कि आतंककारी दिवस मनाउनुहुन्छ ? पार्टी कार्यालयमा जनयुद्धको प्रथम सहिद दिलबहादुर रम्तेल- कृष्ण सेन ‘इच्छुक’हरुको तस्बिरले प्रवेश पाउछ कि पाउदैन ? जनयुद्धका सहिदहरु राष्ट्रिय सहिद घोषित हुन्छन् कि हुदैनन् ? जनवादी क्रान्तिका बाकी कार्यभार कुन भाषणबाट पूरा हुन्छन् अब ? बालकृष्ण ढुंगेलले नयाँ पार्टीको सदस्य बन्न पाउछन् कि अपराधी ठहर गरिन्छ ?

जनयुद्धको बेलामा एमालेको सुराकीमा हत्या गरिएका सहिदका छोराछोरीले सुर्य चिन्हमा मतदान गर्न मानेनन् भने कस्तो प्रकारको जनवादी केन्द्रीयता लागु हुन्छ वा कार्वाही गर्नुहुन्छ ? समाजवादी क्रान्ति मालेमाबादको कति डिग्रीको क्रमभंगतामा हुन्छ ? टनकपुर सम्झौता राष्ट्रबादी सुचीमा सर्छ कि राष्ट्रघाती सम्झौताको रुपमा खारेज गर्ने आन्दोलनको उठान हुन्छ ? वास्तमा प्रचण्ड कुनै ब्यक्तिको नाम मात्र थिएन, बरु जनयुद्धले स्थापित गरेको एउटा ‘राजनैतिक ब्राण्ड’ हो जसको सिधा सम्बन्ध जनयुद्धको सहिदको रगत र तिनको संग जोडिएको छ । हिजो तपाइको आदेशमा बलिदान गरेका सहिदको जिम्मा कसलाई लाएर तपाईं एमालेमा जानुहुन्छ, प्रचण्ड भन्ने ‘ब्राण्ड’ कसलाई धरौटीमा बुझाउनुहुन्छ ? काम्रेड।

इतिहास निर्मम र कठोर हुन्छ । आज बिदेशीहरुको आडमा, सत्ता र शक्तिको भरमा, निजि सुख र सम्पतिको लोभमा आफ्नो बर्ग, जनता र देशलाई घात गरेपनि समयले तपाईलाई एउटा जटिल कठघरामा जरुर उभ्याउनेछ ।

यद्यपि त्यतिबेला गल्ती महसुस गरेर पछि फर्किने कुनै पुल बाकी हुनेछैन तपाईंको लागि, अवसरको नयाँ गन्तव्य चढ्ने कुनै भर्याङ बाकी हुने छैन, भौतिक सुख र सुरक्षाको लागि कुनै दरबार बाकी रहने छैन, राजनीतिक सुरक्षाका लागि कुनै पार्टी र बिचार बाकी रहनेछैन, जालझेल र षड्यन्त्रका लागि कुनै तिक्डम बाकी रहने छैन जनयुद्धको सहिद र घाइतेको परिवारले एक दिन तपाईलाई जनअदालतको कठघरामा उभ्याउने छ। त्यो दिन तपाईंले माफी पाउनुहुने छैन।

लेखक जनसेनाका पुर्ब कमानडर हुन्

यसमा तपाइको प्रतिक्रिया

सम्बन्धित समाचार