काठमाण्डौ , ११ असोज ।
प्रदेश नम्बर २ को एकमात्र महानगर वीरगञ्ज महानगरपालीकाको मतगणना लगभग अन्तिम चरणमा पुगेको छ ।
७८ हजार मत गन्दा नेपाली कांग्रेसलाई पछि पार्दै संघीय समाजवादी फोरम नेपालले अग्रता लिइरहेको छ । वीगन्ज महानगरमा ८४ हजार भन्दा बढी मत खसेको थियो ।
पछिल्लो मतपरिणाम अनुसार संघीय समाजवादी फोरम नेपालका मेयर उम्मेदवार विजयी सरावगीले १८२३१ मत प्राप्त गर्नुभएको छ । भने काग्रेसका अजयकुमार द्विवेदीले १६४९१ मत सहित उहाँलाई पछ्याईरहनुभएको छ ।
राजपाका राजेशमान सिंह ११००१ , नेकपा एमालेका बसुरुद्दिन अन्सारी ८१८६, माओवादी केन्द्रका रहबर अन्सारी ७९३३ र फोरम लोकतान्त्रिकका मेयर उम्मेदवार विमल श्रीवास्तवले ७७६२ मत पाउनुभएको छ ।
उपमेयरमा भने नेपाली काग्रेसको अग्रता छ । काग्रेसका शान्ति कार्कीले १८८८६ मत सहित अग्रता लिईरहनुभएको छ । संघीय समाजवादी फोरमका पिंकी यादव १७५३० मत सहित कार्कीलाई पछ्याईरहनुभएको छ ।
अब विरगन्ज सहित बाराको कलैया उपमहानगरपालिका,र सप्तरीको राजविराज नगरपालिकाको मत परिणाम आउन बाँकी छ ।
प्रदेश नम्बर दुईका १ सय ३६ स्थानीय तहमध्ये १ सय ३३ स्थानीय तहको मतपरिणाम सार्वजनिक भईसकेको छ ।
